Euskal ekonomiari buruzko euskarazko aldizkari bakarra

Guztira, 114.162 langabe daude EAEn, azken urteotako kopururik baxuena.

Euskadin 5.512 langabe gutxiago daude aurreko urtearekin alderatuta

ANDONI BEITIA /2020-01-07/ Euskal Autonomia Erkidegoko (EAE) enpleguko zerbitzu publikoek 114.162 langabe erregistratu dituzte 2019. urtearen bukaeran , hau da, aurrekoan baino 5.512 gutxiago (-%4,61). Abendua bakarrik kontuan hartuta, EAEn 385 langabe gehiago izan ziren (%0,34 gehiago), Espainiako Lan, Migrazio eta Gizarte Segurantzako Ministerioaren datuen arabera.

Halaber, langabeziak EAEko lurralde bakoitzean izan duen bilakaerari erreparatuta, 2019an, Bizkaian 3.087 langabe gutxiago izan dira (-%4,53), Gipuzkoan 1.355 gutxiago (-%4,28) eta Araban 1.070 gutxiago (-%5,41). Modu honetan, Bizkaiak 65.117 langaberekin bukatu du urtea, Gipuzkoak 30.323rekin eta Arabak 18.722rekin.

EAEn 2019an erregistratutako 114.162 langabeetatik, 62.994 emakumeak dira, eta 51.168 gizonak. Gainera, 7.879 langabe 25 urtetik beherakoak dira, eta gainontzeko 106.283ak adin horretatik gorakoak.

Jarduera sektoreka, abenduan, aurreko hilean baino 490 langabe gutxiago zenbatu ziren aurreko enplegurik gabeko kolektiboan, eta guztira 13.575 daude; zerbitzuetan 447 gutxiago izan ziren (75.457), eta nekazaritzan 12 gutxiago (2.509). Industrian 947 langabe gehiago izan ziren, eta guztira 14.326 daude; eraikuntzan 8.295 langabe daude, abenduan 387 gehiago izan ondoren, aurreko hilabetearekin alderatuta.

Gainera, abenduan 75.319 kontratu egin ziren EAEn, azaroan baino 4.732 gutxiago (-%5,91) eta aurreko urtean baino 1.450 gehiago (%1,96). Abenduan sinaturiko kontratu guztien artetik, 69.701 aldi baterako izan ziren (azaroan baino 3.628 gutxiago eta 2018an baino 2.027 gehiago), eta 5.618 mugagabeak (azaroan baino 1.104 gutxiago eta 2018an baino 577 gutxiago).

Bestalde, Gizarte Segurantzak 18.488 harpidedun gehiagorekin bukatu du urtea EAEn (%1,92 gehiago), abenduan 683 gehiago erregistratu ondoren (%0,07 gehiago), eta, modu honetan, 980.592 aWliatu ditu. Lurraldeka, Gizarte Segurantzak 9.470 kide irabazi ditu Bizkaian 2019an (%1,97), Gipuzkoak 6.200 (%1,93) eta Arabak 2.818 (%1,78).