Gipuzkoako Foru Aldundiak kenkari berri bat du onartzeko bidean, ohiko etxebizitzetan eguzki-energia hornitzeko inbertsioak sustatzeko. Eider Mendoza foru bozeramaileak astearte honetan azaldu duenez, % 15eko kenkaria aplikatuko da Pertsona Fisikoen Errentaren gaineko Zergan (PFEZ), lau urtetan aplikatu beharrekoa eta 3.000 euroko mugarekin.
Neurria Gobernu Kontseiluak onartu du dagoeneko, eta litekeena da Gipuzkoako Batzar Nagusien onespena jasotzea martxoko Osoko Bilkuran.
Mendozak zehaztu duenez, hobari berria bi inbertsio motari aplikatuko zaie, betiere PFEZn: batetik, eguzki-panelak zuzenean erostea; eta, bestetik, helburu sozial nagusia eguzki-energia fotovoltaikoaren iturriak aprobetxatzea duten erakundeetan inbertitzea, zergadunaren ohiko etxebizitzari energia emateko (adibidez, EAEn sortzen ari diren energia-kooperatibak, Ekiola kasu).
“Energia berriztagarriak sustatu nahi ditugu horrela, klima aldaketari aurre egiteko Gipuzkoako Foru Aldundiak abian dituen ekimenen barruan”, adierazi du Aldundiko bozeramaileak.