Gipuzkoak 1,2 milioi euro bideratuko ditu hirugarren sektoreko gizarte-proiektuetara

Gipuzkoako Foru Aldundiko Gobernu Kontseiluak astearte honetan onartu du Gipuzkoan gizarte-zerbitzuen arloan diharduten irabazi-asmorik gabeko gizarte-ekimeneko erakundeei diru-laguntzak emateko 2022ko deialdia, 1.221.233 eurokoa.

Programa honen bidez, diru-laguntzak ematen dira esku-hartze sozialeko programak (931.233 euro), prebentzio- eta sentsibilizazio-programak (250.000 euro) eta behar sozial berriei eta gizarte-arretari buruzko ikerketa- eta berrikuntza-proiektuak (40.000 euro) egiteko.

Eider Mendoza foru bozeramaileak prentsaurrekoan azaldu duenez, laguntza-lerro horien bidez “babes handia ematen zaie hirugarren sektoreko erakundeei, gure lurraldean hain diferentziala eta garrantzitsua baita”.

Mendozak adierazi duenez, laguntza-ildo hori Gipuzkoan “finkatutako” laguntza-deialdi bat da, eta, horren bidez, Foru Aldundiak 10 milioi euro baino gehiago banatu ditu azken 10 urteetan gizarte-zerbitzuen arloan lan egiten duten gizarte-ekimeneko erakundeei laguntzeko.

“Gero eta zaharragoa, pluralagoa eta konplexuagoa den gizarte batean bizi gara, erronka sozial handiak planteatzen dizkigun testuinguru batean, hala nola biztanleriaren zahartzea eta gizarteratzea”, gaineratu du.

Gipuzkoako Foru Aldundiaren lehentasuna “desberdintasun sozialei aurre egitea” dela berretsi du foru bozeramaileak, eta “gure ardura dela erronka sozial horiek hazten jarraitzeko aukera bihurtzea”. Horregatik, hirugarren sektoreko erakundeen lana “ezinbestekoa” dela uste du.

Esku-hartze sozialeko programak egiteko diru-laguntzei dagokienez, 199 proiektu bultzatu ziren 100 erakundetan 2021ean. Bigarren lerroan, prebentzio- eta sentsibilizazio-programak diruz lagundu ziren, eta beste 115 proiektu bultzatu ziren 80 erakundetan. Azkenik, hirugarren lerroan, gizarte-premia berriei eta gizarte-arretari buruzko ikerketa- eta berrikuntza-proiektuak diruz lagundu ziren, beste 26 proiektu 25 erakundetan.

Mendozak babestutako ekimenen adibide batzuk aipatu ditu, hala nola Verdini Dantza Taldeak sustatutako dantzaren bidezko sentsibilizaziorako diru-laguntza, Why Not Fundazioaren Why Not Radio proiektua garatzeko diru-laguntza, Kale Dor Kayiko elkarteak ematen dituen sariak antolatzeko auyda, edo Algaraklownek bultzatzen duen Geriatriklown ekimena, adinekoen egoitzetako ekitaldiak eta umore-tailerrak.