Donostiako Udaleko EH Bilduren taldeak euskarazko hedabideetan publizitate gehiago kontratatzea proposatu dio Udal Gobernuari; izan ere, orain % 93,57ko publizitatea gaztelaniazko komunikabideetan kontratatzen du.

Ohar batean, Donostiako EH Bilduk “gutxienez hainbeste espazio kontratatzeko prozesu progresibo” baten aldeko apustua egin du, “publizitatea euskarazko eta gaztelaniazko komunikabideetan kontratatzeko”.

Haren ustez, gaur egun “udal Gobernuak ez du bermatzen donostiarrek informazioa euskaraz jasotzeko duten eskubidea”.

“Euskarazko hedabideetan publizitate instituzionala txertatzeko beharra, aniztasunaren irizpidetik ez ezik, bi hizkuntza ofizial dituen hiri batean euskal hiztun-komunitateari zerbitzu publiko berberak emateko betebeharretik ere ondorioztatzen da”, adierazi du.

Horregatik, bere ustez, tokiko gobernuak “gutxienez gaztelaniazko hedabideetan adina publizitate-tarte kontratatu behar ditu hiriko euskarazko hedabideetan”.

EH Bilduk adierazi duenez, 2021eko aurrekontuetan Donostiako Udal Gobernuak “hiriko euskarazko hedabideei ematen zizkien diru-laguntzak nabarmen murriztea erabaki zuen, % 20 gutxiago Irutxuloko Hitzari eta % 50 gutxiago Hamaika Telebistari, Covid-19aren ondorioei aurre egiteko baliabide ekonomikoak behar zituelako aitzakiarekin”.

Adierazi duenez, “Murrizketa horiek 2022ko aurrekontuetan mantendu dira, nahiz eta Donostiako Udalak 2021a superabit handi batekin amaitu zuen (22,5 milioi euro)”.

Egilea Andoni Beitia