Ines Anitua Euskadiko Automozio Klusterreko (Acicae) eta Automotive Intelligence Centerreko (AIC) CEOak atzo baieztatu zuenez, Ukrainako gatazka belikoak Euskadiko sektorearen aurreikuspenak “zapuztu” ditu epe laburrean. Era berean, krisi hori energia-kostuen igoerari gehituta, automobilgintzaren euskal industrian izango dituen ondorioek “datozen hilabeteetan ere” jarraituko dutela aurreikusi du. Anituak Automozio Sektoreko Desafioak Topaketaren seigarren edizioaren irekieran parte hartu zuen, Amorebietako AIC instalazioetan aurrez aurre egiten dena.

Haren ustez, euskal automobilgintzaren industriak hainbat faktoreren batuketaren ondorioei egin behar die aurre, batez ere Errusiak Ukraina inbaditu izanak eragindakoei. Gainera, “Igoera inflazionistak” sortu dira, eta ez diete lagunduko ez sektoreko enpresei ez kontsumitzaileei, garestitze horren aurrean, “Ibilgailuz aldatzeko gogoa geldiaraziko baitute” epe laburrean.

Testuinguru horri hainbat automobil-multinazionalek Errusian eta Europako beste herrialde batzuetan dituzten lantegien gaineko eragina gehitu behar zaio, “Guztioi, hornitzaileei barne, eragiten digun domino efektu” gisa kalifikatu baitzuen. Hala, automobilgintzaren industriaren egoera “lehergarria da, eta hala izaten jarraituko du datozen hilabeteetan”, baina inbasioaren ondorengo ondorioak nazioarteko komunitatearen erabakien araberakoak izango direla zehaztu zuen.

Hala eta guztiz ere, eta “positiboan” begiratuta, 2021. urtea “arraroa, konplexua” izan da, baina “ez txarra”; izan ere, urte hasieran automobilgintzaren euskal sektorerako fakturazioaren hazkundearen estimazioak, % 9tik % 11ra bitarteko tartean finkatuak, azkenean bete egin dira, 2021a % 10,5eko hazkundearekin itxi baitzen, eta hori “hainbeste pultsu ireki dituen testuinguru batean” da.

Egilea Andoni Beitia