Garbiketa greba Osakidetzan apirilaren 7, 8 eta 9an

CCOO, UGT, ESK, LAB eta ELA sindikatuek greba deitu dute aste honetarako, apirilaren 7, 8 eta 9an, Osakidetzako Garbiketa sektorean, Euskadi osoan.

Osakidetzak azpikontratatutako garbiketa-zerbitzuko langileek lau urte daramatzate sektoreko hitzarmenik gabe, eta enpresekin berrogei bilera baino gehiago egin arren, sindikatuen arabera egoerak hasieran bezala jarraitzen du.

Sindikatuen helburua da Osakidetzako langileekin baldintzak homologatzen jarraitzea eta bere osotasunean betetzea; sindikatuen arabera, ordea, enpresen asmoa homologazioa kentzea da.

Aldarrikapenen artean, Osakidetzako langileei homologazio-printzipioan oinarrituta aplikatzen zaizkien baldintza berberak aplikatzea eskatzen dute: 2012ko karrera profesionala, lanpostu hutsak betetzeko sistema zabalagoa eta justuagoa, txanda-kontratuari lotutako erretiro partziala eskuratzea, Osakidetzako langileek dagoeneko onartuta dituzten baimen berriak, etab.

Baina, sindikatuen arabera, enpresek “ez dute hitzarmenaren egokitzapen txikiena ere egin nahi izan, eta malgutasunik gabe agertu dira. Mahaia blokeatuta dago, blokeo hori Osakidetzak babesten duela dirudi, eta ez dio erantzun egin diren bilera-eskaerei “.