Aldundiak eta Gipuzkoako Ganberak aholkularitza-zerbitzu bat jarri dute martxan Errusiarekin eta Ukrainarekin merkataritza-harremanak dituzten enpresentzat, aplikatzen ari diren zehapen-neurrien berri izan dezaten eta aurkitzen dituzten arazoei irtenbideak proposa diezazkieten. Bi erakundeek jakinarazi dutenez, iaz lurraldeko enpresa-sarean 82 milioi euro esportatu zituen herrialde horietara, eta 52 milioi pasatxo inportatu.

Aldundiak eta Ganberak erabaki hori justifikatzen dute gerran dauden herrialde horiekin eragiketak egiten ari diren negozioek “zalantza asko” dituztelako, bereziki esportazioen atalean. Ildo horretan, iaz Errusiako lurraldetik 1.764 esportazio operazio egin zirela gogorarazi dute, “Horietako asko ez lirateke bideragarriak izango gaurko testuinguruan, edo murrizketa handiak bete beharko lituzkete”.

Zehazki, Gipuzkoak 67,1 milioi euro saldu zizkion Errusiari eta 15,2 milioi Ukrainari; Errusiatik, berriz, 21,2 milioi eta 35 milioi euro inportatu zituen. Foru eta ganbera erakundeek emandako informazioaren arabera, Errusia Gipuzkoako enpresen arteko lehen 20 herrialdeen artean egon ohi da, batez ere lehengai eta hidrokarburoak inportatzeko eta automobilgintzako makineria eta osagaiak esportatzeko.

Ukraina, bestalde, Gipuzkoako automobilgintzako makineria eta osagaiak erosten dituen lehen 50 bazkide komertzialen artean dago. Egungo gerra-egoeraren aldakortasunak, Errusiako eta Europar Batasuneko agintarien aldetik murrizketa berriak sortzea eragiten duenak, ziurgabetasun handiko testuinguruan kokatzen ditu herrialde horiekin merkataritza-tratua duten konpainiak, eta zerbitzu berri hori sortzea gomendatzen du.

Doako aholkularitza zerbitzua

Aholkularitza doakoa da, eta 943000300 telefonoaren edo argibide@camaragipuzkoa.com posta elektronikoaren bidez eskura daiteke. Bertan, abian diren eskaerak betetzeko aukerari, Europa mailan hartutako administrazio-neurrien eraginari, inportazio jakin batzuetarako sarbideari edo esportazio-eragiketetarako eskakizunei buruzko informazioa eskuratu ahal izango da.

Aldundiak eta Ganberak enpresa-kolektibo horrek aurre egin beharreko hainbat arazo aipatu dituzte, hala nola dibisak transferitzeko murrizketak, garraioaren mugak eta produktu jakin batzuk esportatzeko baimenak lortzeko beharra, “Europar Batasuna ia egunero eguneratzen ari baita, zigortuen zerrendan enpresa edo pertsona berriak sartuz”, eta horrek “zalantzak sortzen ari dira Gipuzkoako konpainia inportatzaile eta esportatzaileen artean”.

Jabier Larrañaga Ekonomia Sustapeneko eta Proiektu Estrategikoetako diputatuak nabarmendu duenez, zerbitzua horiek argitzen saiatuko da, eta ekimen hori foru erakundeak lurraldeko enpresetatik hurbil egoteko duen konpromisoaren barruan kokatu du, konfiantza helarazteko. Gipuzkoako Ganberako presidente Pedro Esnaolak, bere aldetik, lankidetza publiko-pribatua azpimarratu du, eta gogorarazi du ganbera-erakundeak Espainiako Ganberaren eta Ganberen nazioarteko sarearen babesa duela “enpresei beren nazioarteko jarduna errazteko unean uneko egoeraren barruan ahalik eta ingurune seguruenean”.

Egilea Andoni Beitia