Ostatuko eta jatetxeetako turismo-enpresek, bitartekaritzako turismo-enpresek, turismo-garraioko enpresek, turismo aktiboko enpresek, biltzarrak antolatzen dituzten enpresa profesionalek, gida turistikoen enpresek eta autokarabanentzako harrera-eremu bereziek eska ditzakete Eusko Jaurlaritzako Turismo, Merkataritza eta Kontsumo Sailak turismo-jarduera berreskuratzeko eta bultzatzeko onartu dituen laguntzak.

Diru-laguntza horiek, 652.000 eurokoak, COVID-19ak eragindako krisi ekonomiko eta sanitarioaren testuinguruan kokatzen dira, eta maiatzaren 20ra arte eska daitezke.

Zehazki, EMET programak Euskal Autonomia Erkidegoan negozio turistiko berriak sortzen lagunduko du, tokiko garapena erraztuko dutenak, bai eta euskal turismo-enpresen lehiakortasuna hobetzera bideratutako jarduerak ere, berrikuntza teknologikoa bultzatuz, haien turismo-eskaintza hobetuz eta optimizatuz. “Turismo seguru, iraunkor, arduratsu eta irisgarrira” egokitzeko jarduerak ere kontuan hartuko dira.

Diru-laguntzen ildoak ekintzailetza-proiektuak dira, turismo-negozio berriak eta turismo-enpresen lehiakortasuna hobetzeko ekimenak sortzeko.

Diruz lagundu ahal izango dira 2022ko urtarrilaren 1etik abenduaren 31ra bitartean egin eta fakturatzen diren jarduerak, honako ildo hauetakoren batean sartzen badira: negozio turistiko berriak sortzeko ekintzailetza; enpresa turistikoen lehiakortasuna hobetzea; enpresa-berrikuntza eta zerbitzu turistikoak irtenbide teknologikoen bidez; enpresen eskaintza turistikoa hobetzea eta optimizatzea; eskaintza turismo seguru, iraunkor, arduratsu eta irisgarrira egokitzea.

Egilea Andoni Beitia