CEITek 40 milioi inbertituko ditu soluzio teknologikoetan

Donostian egoitza duen Ceit zentro teknologikoak datozen lau urteetan 40 milioi euro inbertitzea aurreikusi du, enpresa-sareari digitalizazioa areagotzeko eta lehiakorragoa izateko aukera emango dioten irtenbide teknologikoak diseinatzeko. Plan estrategikoak, halaber, dagoeneko erreferente diren ezagutza-arloetan espezializatzea eta talentua erakartzea eta atxikitzea aurreikusten du.

CEITek 2025era arteko helburuen berri eman du gaur, besteak beste, enpresari zuzendutako berrikuntzan egindako inbertsio handia. Adierazi duenez, bere lehentasunetako bat enpresen beharrei erantzungo dieten aktibo teknologiko berriak lortzea izango da, eraldaketa digitaleko prozesu batean murgilduta daudenak, eta hortik datorkio aurrekontu handia.

Ikerketa industria ikuskatzeko eta monitorizatzeko sistemetan, jarduteko sistema ziberfisikoetan, biki digitaletan eta “puntako” ekipamenduko eta instalazio “berezietako” inbertsioetan oinarrituko da.

Helburu hori betetzeko, hazkunde iraunkorrari eustea ere ezarri da helburu gisa, fakturazioaren % 40 eta % 50 bitartean enpresetarako transferentzia teknologikoko proiektuetatik etortzea, doktoregaien kopurua % 30 baino gehiago handitzea eta oinarri teknologikoko hiru enpresa berri sortzea.

Espezializazioa indartzea

José María Rodríguez Ibabe zentro teknologikoko presidente exekutiboak adierazi duenez, espezializazioa izango da Ceit indartuko duen beste arloetako bat, zentroa dagoeneko “erreferentzia” den arloetara bideratua. Eremu horien artean daude fabrikazio aurreratua, garraio iraunkorra, ekonomia zirkularra edo digitalizazioa.

Arlo horiek guztiak bat datoz Eusko Jaurlaritzak Euskadin etorkizuneko ekonomia garatzeko ardatz gisa ezarri dituen lehentasunekin eta Ceit kide duen Basque Research and Technology Alliance BRTArekin.

Horri dagokionez, Rodriguez Ibabek azpimarratu du zentro teknologikoa Europako I+G aliantza berri baten kide sortzailea dela trenbidearen esparruan, eta, ziurtatu duenez, “Mugarri bat izan daiteke” Ceiten historian, garraio mota horren eraldaketaren eragile bihurtu baita.

Espezializazioarekin eta irtenbide teknologiko berrien garapenarekin batera, Ceitek talentua erakartzeko eta atxikitzeko lan egingo du, hainbat neurriren bidez, hala nola lan-baldintzak malgutzea, garapen profesionala eta pertsonala sustatzeko prestakuntza, eta “bikaintasun zientifikoa bultzatzea”.