Gonzalo García Andrés Ekonomiako eta Enpresari Laguntzeko Estatu idazkariak joan den ostegunean nabarmendu zuenez, lan-merkatua “Espainiako ekonomia suspertzeko motorra” izaten ari da, nahiz eta egoera “zaila” izan gerrak Ukrainan izan dituen ondorioengatik, eta balioa eman zion lan-erreformaren eraginez enplegu mugagabearen sorrera bizkortzeari.

“Enplegua sortzeaz gain, kalitatezko enplegua, enplegu egonkorragoa eta errenta-aukera hobeak dituena sortzen ari da”, nabarmendu zuen Estatuko idazkariak BAIko datuak aurkezteko prentsaurrekoan.

Garcia Andresek balioetsi du urtarriletik martxora bitartean okupazioa 20 milioitik gorakoa izatea, nahiz eta urteko lehen hiruhilekoa urtarokotasun txarrekoa izan ohi den, eta oraingo honetan aldaketa omikronarekin hasi zen, eta, ondoren, energiaren prezioen igoeraren, botila-lepoen eta gerrak Ukrainan izan zuen eraginaren ondorioak jasan zituen.

Gainera, balioetsi zuen azken urtean enpleguaren hazkundea handiagoa izan zela kontratu mugagabea duten langileen artean (557.700 landun gehiago) aldi baterako 266.500 landunen aldean, eta azkartu egin zela enplegu mugagabearen sorrera azken hiruhilekoan, lan-erreformaren eraginez.

Oro har, azken urtean 878.000 lanpostu sortu ziren, 20 milioi landun baino gehiago. Hala ere, hiruhilekoei dagokienez, okupazioa 100.000 pertsonatan jaitsi da. “Beherakadak erakusten du hiruhilekoa normala dela urtaroen arabera, eta 2021, 2020 eta 2018koa baino askoz hobea dela”, adierazi du.

Lan-merkatuaren dinamismoa, urte arteko terminoetan, orokorra izan zen: enplegua sortu zen eta langabezia murriztu zen jarduera-sektore guztietan eta autonomia-erkidego guztietan.

Bestalde, okupazioaren hazkundea sektore pribatuan kontzentratu zen azken urtean, 807.200 enplegu sortu baitziren, eta % 5,11ko hazkundea izan zuen, sektore publikoan 70.700 enplegu sortu ziren bitartean, hau da, % 2,08ko hazkundea.

Egilea Andoni Beitia