Gizarte Segurantzak 42 milioi euroko saldo positiboa izan zuen martxoaren 31ra arte, eta aurreko urteko aldi berean 628,6 milioi euroko defizita izan zuen, Gizarteratze, Gizarte Segurantza eta Migrazio Ministerioak atzo argitaratutako datuen arabera. Gizarte Segurantzak azaldu duenez, saldo positibo horrek gizarte-kotizazioen % 6,4ko igoerari erantzuten dio, “Enpleguaren dinamismoari esker”.

42 milioi euro horiek 40.183,3 milioi euroko diru-sarreren ( % 3,4 igo dira) eta 40.141,3 milioiko gastuen (iazko aldi berean baino % 2,8 gehiago) arteko aldea dira.

Diru-sarreren guztizko bolumenetik, % 90,5 Gizarte Segurantzako erakunde kudeatzaileei eta zerbitzu komunei dagokie, eta gainerako % 9,5 Gizarte Segurantzarekin lankidetzan diharduten mutuei. Betebeharrei dagokienez, % 91 erakunde kudeatzaileek eta zerbitzu komunek aitortu dute, eta % 8,9 Gizarte Segurantzarekin lankidetzan diharduten mutuek.

Kutxari dagokionez, sistemaren bilketa likidoa 39.317,9 milioira iritsi zen martxora arte, hau da, % 3,9ko gehikuntza. Bestalde, ordainketek % 1,8 egin dute gora, 40.059,7 milioira arte. Kotizazioengatiko diru-sarrerak % 6,4 igo ziren urte batetik bestera martxoan, 34.245,3 milioiraino, landunen kotizazioengatiko bilketa % 7,8 handitu ondoren, eta langabeen kotizazioak % 11,2 jaitsi ondoren (267,6 milioi).

Egilea Andoni Beitia