Parke eolikoak jartzeko zailtasunak kritikatu ditu EEEk

Iñigo Ansola EEE Energiaren Euskal Erakundeko zuzendari nagusiak atzo adierazi zuen ezin dela “hainbeste sufritzen jarraitu parke fotovoltaikoak edo eolikoak instalatu ahal izateko”, eta, beraz, uste du akordio batera iritsi beharko litzatekeela edo, gutxienez, gai horiei buruz eztabaidatu. UGT-FICA elkarteak antolatutako Hidrogeno Berriztagarria: energiaren Etorkizuna jardunaldian egin zituen adierazpen horiek Ansolak.

Iñigo Ansolak Euskadin gertatu den mix energetikoaren eraldaketa ekarri zuen gogora, eta 80ko hamarkadan gasik ia ez zela erabiltzen adierazi zuen, ondoren iturri horren aldeko apustua egiteko. Horrekin batera, teknologia berriztagarria garatzeko apustu garrantzitsua egin zen.

Halaber, baieztatu zuen Euskadin energia % 50 gutxiago kontsumitzen ari dela azken 40 urteetan energia-eraginkortasunaren arloan hartu diren neurriekin.

EEEko zuzendari nagusiak adierazi zuen orain energia-krisi berri bat bizi dela, batez ere Europa mailan, energia-sektorean dagoen “mendekotasun oso handiak” eraginda, dela petrolioaren deribatuekiko, dela gas naturalarekiko. “Ikusi besterik ez dago, otsailaren 24tik, jasaten ari garena”, esan zuen elektrizitatearen prezioari buruz.

Alde horretatik, espero du sistema marjinalistako gasaren prezioa mugatzeko neurriek, “Gutxienez, nolabait, elektrizitatearen prezioa jaisten lagunduko dutela”, baina oinarrizko arazoa “hor dago oraindik, mendekotasun energetikoa izugarria da eta erronka izugarriak daude”.

Ansolaren ustez, hidrogenoaren bektoreak “lagundu dezake bide horretan”, baina “oinak lurrean izan behar dira”. “Hidrogeno berdeaz asko hitz egiten ari gara, ondo, baina ezin dugu hainbeste sufritzen jarraitu parke eolikoak edo parke fotovoltaikoak instalatu ahal izateko, edo ausartuko nintzateke esatera, biomasa erabiliz proiekturen bat sustatzea bururatzen bazaigu (…), horiek sustatzeko arazoak izango genituzkeela ziur nago”, adierazi zuen.