Eusko Jaurlaritzak eta Arabako Foru Aldundiak akordio bat sinatu dute astearte honetan Mercedes-Benz España enpresarekin, eta, horren bidez, automobilgintzako multinazionalaren esku jarri dituzte Euskadiko hainbat ikerketa-zentro eta lanbide-heziketako zentro, hala nola BRTA eta Teknika sarean integratutakoak.
Akordioaren sinaduran Iñigo Urkullu lehendakariak, Arantxa Tapia Garapen Ekonomikoko sailburuak, Ramiro Gonzalez Arabako ahaldun nagusiak eta Emilio Titos Mercedes-Benzek Gasteizen duen lantegiko zuzendari nagusiak hartu dute parte.
Elkar ulertzeko memorandum honen sinadura multinazional alemaniarrak Arabako lantegia eredu berrien fabrikaziora egokitzeko 1.200 milioi euro baino gehiago inbertitzeko asmoa iragarri eta bi astera gertatu da. Proiektu hori sindikatuek lantegi horretako langileen lan-baldintzetan malgutasun handiagoa onartzearen baldintzapean dago.
Gainera, akordioa sinatu aurretik lehendakariak bilera egingo du Stuttgarten (Alemania) Mercedes Benz Vanseko zuzendari exekutiboarekin (CEO).
Astearte honetako hitzaldian, Urkulluk azpimarratu du Mercedes-Benzek Vitoria-Gasteizerako aurreikusitako inbertsioak “urrats handia” izango liratekeela “automobilgintzaren industria osoa eraldatzeko eta lantegia konpainiaren lehiakorrenetako bat izateko”.
Lehendakariak azaldu duenez, astearte honetan sinatutako akordioarekin, Eusko Jaurlaritzak, Arabako Foru Aldundiak eta Mercedes-Benzek “indarrak batu dituzte pandemia osteko tokiko ekoizpen-egitura eraldatzeko eta indartzeko”.
Lehentasunezko hiru arlo
Ildo horretan, “aurrerapen teknologiko-digitalarekin eta energetiko-klimatikoarekin” duen konpromisoa adierazi du, eta iragarri du datozen urteetan “lehentasunezko” hiru arlo indartzeko lan egingo dela: ibilgailuaren elektrifikaziora bideratutako I+G+b jardueraren garapena, ekoizpen-prozesuen digitalizazioa eta konektibitatea, eta ingurumenaren iraunkortasuna.
Helburu horrekin, adierazi du “Mercedes-Benzen esku” jartzen direla ‘Basque Research Technology Alliance’ (BRTA) eta ‘4GUNE Ingeniaritza, Zientzia eta Teknologiako Unibertsitate Prestakuntzako Klusterra’ zentroek, TEKNIKA-Lanbide Heziketako Ikerketa Aplikaturako Eusko Jaurlaritzaren Zentroarenak eta HETEL-Euskadiko Lanbide Heziketako Ikastegien Elkartearenak eskaintzen dituzten “gaitasunak”.
“Gaitasun horiei esker, ibilgailu elektrikoan fabrikazio digital eta jasangarriko prozesuetarako behar diren profil profesionalen gaitasunak hobetu ahal izango dira”, adierazi du Urkulluk, eta gaineratu du Mercedes-Benz Vitoria enpresak “langile guztiak gai horretan trebatzeko konpromisoa” hartzen duela.