Nord Stream gasbideko operadoreak uztailean 11 egunez geldituko ditu gas errusiarra Alemaniara garraiatzen duten bi hariak Itsaso Baltikoaren azpitik, konponketa planifikatuak egiteko, konpainiak gaur iragarri duenez.

“Uztailaren 11tik 21era Nord Stream AG konpainiak Nord Stream gasbidearen bi hariak geldituko ditu aldi baterako, planifikatutako lan profilaktikoak egiteko”, adierazi zuen enpresak ohar batean.

Nord Stream AGren arabera, lanetan osagai mekanikoen eta kontrol automatizatuko sistemen probak egingo dira, “Gasbidearen ustiapen eraginkorra, segurua eta fidagarria bermatzeko”.

Enpresak gaineratu zuen konponketen kronograma aldez aurretik adostu zela Nord Stream AGko bazkideekin.

Robert Habeck Alemaniako Ekonomia eta Energia ministroa kezkatuta agertu zen ostegun honetan, konponketak aitzakiatzat hartuta Nord Stream “erabat blokeatu” daitekeelako.

Hilabete honetan, gas naturalaren fluxua % 60 murriztu da hoditik, Gazprom enpresa errusiar estatalaren arabera, Moskuren aurkako zigorrekin zerikusia duten gorabehera teknikoengatik.

Hori dela eta, Habecken arabera, ez litzateke “oso harrigarria” izango Gazpromek prest jartzeko lanak amaitu ondoren honako hau esango balu: “Zoritxarrez, ezin dugu suspertu, zerbait aurkitu dugu mantentze-lanetan, eta akabo”.

Ildo horretan, egoera “nahiko tirabiratsua” dela gaineratu zuen ministroak.

Joan den hilean gasbidetik Alemaniara iristen den gas-fluxua eguneko 167 milioi metro kubikotik 100 milioira murriztu ondoren, Berlingo Gobernuak alerta-maila ezarri zuen gas-eskasiaren agertoki baterako prestatutako larrialdi-planean.

Habecken arabera, Alemaniak gasaren erdia baino ez du biltegiratzen egunero, gas-biltegiek duten guztizko edukieraren % 0,3 eta % 0,5 artean, gaur egun edukieraren % 61 beteta.

Hala ere, beharrezkoa da deposituak osorik egotea neguari begira; ordurako beharrezkoa da bi terminal flotatzaile konektatuta egotea gas natural likidotua (GNL) itsasoz inportatzeko, ministroak adierazi zuenez.

Egilea Andoni Beitia