Europako finantza-sektoreko hiru gainbegirale nagusiek ohartarazi dutenez, egungo ingurune makroekonomikoak kontrako eragina izango du finantza-erakundeen kreditu-zorroetan, eta, horregatik, etorkizuneko erronketarako prestatzeko gomendatu diete ikuskatzaile nazionalei eta merkatuko parte-hartzaileei.

Horrela islatzen da Europako Banku Agintaritzaren (EBA, ingelesezko sigletan), Pentsio eta Aseguruen Europako Agintaritzaren (Eiopa, ingelesezko sigletan) eta Baloreen eta Merkatuen Europako Agintaritzaren (ESMA, ingelesezko sigletan) aurtengo udazkeneko arrisku-txostenean.

Hiru erakundeek adierazi dutenez, Ukrainako gerrak inguru makroekonomikoa “azkar hondatzea” eragin du, Europako ekonomiei presioa gehituz lehendik zetozen arazoei, hala nola energia-prezioen gorakadari edo eskaintza- eta eskaera-arazoei.

“Finantza-kostu handiagoak eta ekoizpen ekonomiko txikiagoa konbinatzeak presioa eragin dezake gobernuen, enpresen eta etxeen zorra birfinantzatzean, eta, aldi berean, modu negatiboan eragiten du finantza-erakundeen mailegu-zorroen kreditu-kalitatean”, ohartarazi dute hiru agintariek.

Bestalde, finantza-erakundeek arrisku zibernetikoekin eta Errusiaren aurkako zigorren ezarpenarekin lotutako erronka operatiboei ere aurre egiten dietela gogorarazi dute.

Egilea Andoni Beitia