Gipuzkoako Foru Aldundiko Ogasun eta Finantza Departamentuak aldizka egiten duen txostenak, enpresek emandako datuekin, adierazten du urteko lehen zortzi hilabeteetako fakturazioa % 16,1 hazi dela, aurreko ekitaldiko aldi beraren aldean. Hala ere, garai hartan koronabirusaren pandemiarekin lotutako murrizketak mantentzen zirela zehaztu du, eta errealitatera gehiago hurbiltzen dela uste du 2019ko lehen zortzi hilabeteekin konparatzea, hazkunde handiago baten emaitzarekin, % 17,4koa. Ondorioz, Gipuzkoako enpresek denboraldi egonkor eta normaletan baino gehiago saltzen dute 2022an.

2021eko datuekin alderatuta, sektore ekonomiko guztiek izan dute goranzko bilakaera, eta industriaren eta zerbitzuen kasuan, eraikuntzaren kasuan baino handiagoa izan da. Industriako salmentak aurreko urtekoak baino % 18,5 handiagoak izan dira; zerbitzuen salmentak, berriz, ia ehuneko 14 puntu handiagoak izan dira. Eraikuntzak, ordea, ez du bi digituko hazkunderik izan salmentak % 8,3 igotzean, eta joera horrek hobera egin du urtea igaro ahala; izan ere, maiatza arte beherakadak izan zituen.

Esportazioak, berriz ere, barruko salmenten gainetik nabarmentzen dira, eta horrek erakusten du Gipuzkoako enpresa-sareak nazioarteko izaera handia duela. Bai Europar Batasuneko herrialdeetara zuzendutakoak, bai Europar Batasunetik kanpoko merkatuetara zuzendutakoak % 17,5 hazi dira, eta inportazioen portaera nabarmentzen da: ia ehuneko 22 puntuko igoera izan dute EBtik etorritakoek, eta % 48,6ko igoera handia Europar Batasunetik kanpoko herrialdeetan erositakoek.

Egilea Andoni Beitia