Euskal Autonomia Erkidegoko (EAE) Justizia Auzitegi Nagusiak (JAN) ebatzi du Gipuzkoako arte grafikoetako iazko soldata-igoera % 0,75ekoa izatea, Adegi patronalak soldatak % 0,25 soilik igotzeko hartutako erabakiaren aurka, KPIa puntu erdi negatiboa izan zelako. LAB sindikatuak, demanda aurkeztu duen bakarrak, gaur eman du epaiaren berri.
Gipuzkoako Arte Grafikoen sektoreko hitzarmenak KPIa gehi % 0,75eko soldata-igoera ezartzen zuen 2021erako, LABek azaldu duenez, eta Adegik % 0,50 deskontatzea erabaki zuela gaineratu du, inflazioak puntu erdi negatiboan itxi zuelako, KPIaren igoeraz gain % 0,75eko soldata-igoera hitzartu zenean. Adierazi du EAEko Auzitegi Nagusiak bere egin dituela LABek emandako argudioak Gipuzkoan sektore horretako langileen soldatak % 0,75 igotzea erabakitzeko.
LABek erabaki hori baloratu du, oinarrizko produktuak izugarri garestitzen ari direla ikusten den unean. Ondorio kaltegarriei aurre egiteko, Garbiñe Aranbururen sindikatuak uste du ezinbestekoa dela aberastasunaren banaketaren alde egitea eta langileen erosteko ahalmena bermatzea.