Iberdrolak 2025erako plan estrategikoa eguneratuko du bihar, Londresen egingo duen Capital Markets & ESG Day dela eta. Bertan, taldeak egungo testuinguruan erronka berriei heltzeko ibilbide-orria aurkeztuko du.
Hasiera batean martxorako aurreikusia, planaren aurkezpena atzeratu egin zen, Errusiak inbaditu ondoren Ukrainan gerra piztu izanak eragindako ziurgabetasunaren ondorioz.
Konpainiak 2022-2025 aldirako ibilbide-orria eguneratuko du ekitaldi horretan, eta nazioarteko inbertsio-funtsen analista eta kudeatzaile nagusiak bertaratuko dira, energiaren bilakaera eta finantza-posizioa jarraitzen dutenak. 2020ko azaroan, Iberdrolak 75.000 milioi euroko inbertsio historikoa egin zuen 2020-2025 aldirako, Espainiako enpresa baten handiena, munduko ekonomia nagusiek aurre egin beharreko iraultza energetikoaren aukerei aurrea hartzeko eta covid-19aren krisiaren aurrean suspertzea bultzatzeko.
Ordutik, pandemia gaindituta dagoela dirudi, baina beste tentsio batzuk sortu dira nazioartean, batez ere gerra, eta horiek irauli egin dute munduko ekonomiaren bilakaera. Duela astebete pasatxo, lehen bederatzi hilabeteetako emaitzak aurkeztu zituela-eta, Iberdrolak berretsi egin zuen 4.000 eta 4.200 milioi arteko irabazi garbiak izango zituela 2022rako, nahiz eta Espainian negozioak portaera txarra izan ( % 14 jaitsi zen irailera arte).