Hazinnova programaren laguntzari esker lehen berrikuntza proiektua arrakastaz ezarri duten Arabako hogeita hamabost enpresak enpresa berritzaile gisa akreditazioa jaso dute ostegun honetan, Berrikuntzaren Euskal Agentzia-Innobasque, SPRI Taldea eta Eusko Jaurlaritzako Ekonomiaren Garapen, Jasangarritasun eta Ingurumen Sailaren eskutik. Beren erakundeetan berrikuntza ez-teknologikoko mikroproiektuak ezarri dituzten enpresak dira, merkatuan duten posizioa hobetzeko.
Aitorpen hori emateko ekitaldia Vital Eraikinean egin da, eta bertan izan dira Alberto Fernández, Eusko Jaurlaritzako Teknologia eta Berrikuntzako zuzendaria, eta Leire Bilbao, Innobasqueko zuzendari nagusia. Arabako hiriburuan egingo den jardunaldi hau EAEko hainbat eskualdetan egingo diren bost topaketetatik azkena izango da. Bertan, EAEko 209 enpresa txiki eta ertainek berrikuntzaren euskal ekosisteman sartzeko egindako ahalegina aitortu da.
Jardunaldian, ETEekin batera, sareko tokiko hamar eragileen ordezkariak egon dira, zeinek laguntza eman baitiete beren berrikuntzako mikroproiektuak ezartzeko prozesuan: Arabako Merkataritza Ganbera, GAIA, Laudioko Udala, Hegan, AFM, Galdaketa Klusterra, ASLE, Elikadura Klusterra, Siderex eta Habic.
Gaur aintzatespen hori jaso duten Arabako enpresa txiki eta ertainek 50 proiektu osatu dituzte guztira Hazinnova 2021 deialdiaren bidez. Berrikuntzak dira, bai produktuan, bai negozio-prozesuetan, fabrikazioan, logistikan, merkaturatzean, administrazioan edo finantzetan. 2021eko deialdian, programak 2.300.000 euroko aurrekontua izan du.