Euskal ekonomiari buruzko euskarazko aldizkari bakarra

Primarkek Bilboko denda irekiko du aurten Bizkaia Dorrean

Primarkek, low cost modako irlandarrak, aurten Bizkaiko hiriburuan denda bat irekitzeko asmoa du. Bizkaia dorreko lehen sei solairuak hartuko ditu, eta konpainiak Estatuan duen bigarren lokalik handiena izango da.

Prezio baxuko arropa eta osagarrietan espezializatutako merkataritza-taldeak Bizkaian duen bigarren denda izango da, Portugaleteko Ballonti merkataritza-gunean lokal bat baitu dagoeneko. Makrodenda berritik eguneko 5.000 bezero inguru igarotzea espero da, sektorearen gorakada kontuan hartuta.

Primark BBVAren egoitza historikoaren lehen solairuak hartuko ditu, hiriko txoko komertzial jendetsuenetako batean, Bizkaiko hiriburuko Kale Nagusiari hasiera ematen dion plazan, hain zuzen ere. Gainerako solairuek bulegoetarako erabilera izaten jarraituko dute, eta bertan Ekintzailetzaren Nazioarteko Zentroaren egoitza egongo da, Bizkaiko Aldundiak eta Bilboko Udalak bultzatuta. ENZak hiru fase izango ditu: lehenengoan lau solairu hartuko ditu, seigarrenetik bederatzigarrenera; bigarrenean, beste bost, hamargarrenetik hamalaugarrenera; eta hirugarrenean, hamabosgarren eta hamaseigarren solairuak.

1988ra arte, dorrea Banco de Vizcayaren egoitza nagusia izan zen, eta Argentariarekin bat egin ondoren, BBVAren zerbitzu zentral eta korporatiboak hartu zituen, bankuaren egoitza soziala Bilboko Alde Zaharreko San Nikolas Plazan mantentzen den arren.

Aldi berean, Primarkek Gipuzkoan Garbera merkataritza-gunean lehen denda irekiko duela jakinarazi zuen, 3.900 m2-ko hedadurarekin, bi solairutan banatuta. Establezimenduan moda-markaren bilduma osoak (Woman, Man & Kids) aurkitu ahal izango dira, baita oinetakoak, osagarriak, arropa zuria, edertasun-produktuak eta etxeko tresnak ere.

Primarken ustez, Garberan egingo den irekiera “mugarri bat izango da, ez bakarrik hiriarentzat, baita Gipuzkoako eskualdearentzat eta eragin eremu osoarentzat ere, Nafarroa eta Frantziako hegoaldea barne”.

Carlos Inacio Primarkek Espainian duen zuzendari nagusia baikor agertu da datozen urteetarako irekiko diren denda berriekin; izan ere, Bilbon eta Donostian ez ezik, San Fernandon (Cadiz), Gironan, Madrilen, Vigon eta Marbellan ere badaude dendak. “Espainia izan zen Primarkentzat lehen merkatu garrantzitsua Mendebaldeko Europan duela hamarkada bat baino gehiago, eta pozik gaude zazpi denda berri irekiko ditugulako leku berrietan, Espainian izan dugun etengabeko hedapenaren barruan”, adierazi du.