Idoia Mendia bigarren lehendakariorde eta Lan sailburuak uste du Euskadiko kalitatezko enpleguak erakundeen, eragile sozialen eta ekonomikoen arteko “aliantza estrategikoa” behar duela, helburu horretan “aurrera egiteko”.

Horregatik, arlo honetan partekatutako politika berriak bultzatzeko kalitatezko Enpleguaren aldeko Itun Sozial batean parte hartzea proposatu die inplikatutako sektoreei.

Mendiak ostegun honetan Bilbon hasi den Euskadiko Enpleguaren VI. Kongresuaren inaugurazio hitzaldian egin du proposamena. Bertan, besteak beste, Jose Antonio Marina filosofo, idazle eta pedagogoak eta Maria Laffaire KSNET Knowledge Sharing Network-eko ikertzaileak parte hartuko dute.

Era horretako azken bileratik lortutako lorpenak errepasatu ditu, besteak beste, Gizarteratzeko eta Diru Sarrerak Bermatzeko Euskal Sistemaren Legea, “ez bakarrik horretarako eskubidea dutenak hobeto babesteko pentsatua, baizik eta posible direnak enpleguarekin lotzea lortzeko”.

Hala ere, Mendiak uste du “bideak ezin duela hemen amaitu, eta aurrera egitea ahalbidetuko duen aliantza estrategiko bat” behar duela; hori dela eta, kalitatezko Enpleguaren aldeko Itun Sozial bat proposatu du, “herrialdeko erronka handiei erantzun kolektiboa emateko konpromisoa, partekatutako enplegu-politika berrien eragilea izango dena”.

Etorkizunari begira, lehendakariordeak Euskadik izango duen lehen Enplegu Legea laster onartzeari buruz hitz egin du, “enplegu-politika berriak dinamizatzea” ahalbidetuko duena.

Lege horrek “lan duina aitortzen du eta herritartasun-eskubideak zabaltzen ditu, Lanbidek orientaziorako eta lan-aktibaziorako plan pertsonalizatua berma diezaion pertsona orori”, gaineratu du.

Ildo horretan, lehen erronka gisa adierazi du “gure enplegu-zerbitzu publikoaren eraldaketa” amaitzea, eta berretsi du Lege horrek betebehar batzuk betetzea ekarriko duela, hala nola “Enpleguaren Euskal Sareko eragileen koordinazioa, kudeaketa-tresnak homogeneizatzea, eta eraginkorrak eta efizienteak izatea enplegu-zerbitzuen zorroa gauzatzean”.

Gaineratu duenez, “etorkizunari oinarri sendoetatik begiratu behar diogu”, hiru urte gorabeheratsuen ostean, eta, horretarako, “Elkarrizketa Sozialerako Mahaiarekin batera gaude, enplegu duina sustatzeko, jarduera ekonomiko lehiakorra eta iraunkorra bultzatuz”.

Amaitzeko, lehendakariordeak bere Sailaren 2024rako aurrekontuak aipatu ditu. Aurrekontu horietan “garai honetan bultzatu ditugun egiturazko aldaketak bistaratzen dira”.

Besteak beste, gizarteratzeko eta laneratzeko, prestakuntzan berritzeko, zainketen profesionalizaziorako eta enpresetan pertsonak antolatzeko proiektu berrirako partidak nabarmendu ditu.


Egilea Admin