Eustatek landutako datuen arabera, abuztuan % 3,6 gehitu ziren Euskal AEko hotel-establezimenduetako sarrerak eta gaualdiak % 1,6, urte arteko baliotan. 426.038 sarrerek 911.049 gaualdi eragin dituzte.
Sarreren % 53,4 eta gaualdien % 50,4 atzerritarrak izan dira, sarreren kasuan % 6,5 eta gaualdien kasuan % 5,5 igo ondoren.
Lurraldeka, Araban 63.344 sarrera eta 127.134 gaualdi erregistratu dira, aurreko urteko abuztuan baino % 7,7 eta % 7,4 gehiago. Gipuzkoan, sarrerak % 7,5 gehitu dira eta gaualdiak % 4,3; 173.914 sarrera eta 385.535 gaualdi izan dira guztira. Bizkaian, aldiz, % 1,1 sarrera gutxiago izan dira (188.780 sarrera 2024ko abuztuan) eta 398.380 gaualdi ( % 2,5 gutxiago).
Hiriburuen arabera, sarreren kopurua % 12,9 igo da Gasteizen eta % 7,4 Donostian. Bilbon, sarrerak % 1,8 murriztu dira. Era berean, aurreko urteko abuztuaren aldean, gaualdien igoera % 11,0ra iritsi da Gasteizen eta % 8,1era Donostian. Bestalde, Bilbon % 3,3 gaualdi gutxiago izan dira.
Batez besteko egonaldia
Euskal AEko hotel-establezimenduetako batez besteko egonaldia, 2024ko abuztuan, 2,14 egunekoa izan da, aurreko urteko hil berean izandako 2,18 egunen azpitik.
Euskal Autonomia Erkidego osoko okupazio-maila % 78,8koa izan da abuztuan, plazen arabera neurtuta, eta % 85,8koa logelen arabera neurtuta. 2024ko abuztuarekin alderatuta, beherakada 1,5 eta 1,6 ehuneko-puntukoa izan da, hurrenez hurren.
Donostia, hiririk garestiena
Eguneko batez besteko tarifa (bainugela bakarra duen logela bikoitzari aplikatuta) edo ADR tarifa 143,8 eurokoa izan da 2024ko abuztuan Euskadin, hau da, % 5,8ko igoera aurreko urteko abuztuarekin alderatuta. ADRa 177,0 eurotan kokatu da Gipuzkoan, 127,0 eurotan Bizkaian eta 97,5 eurotan Araban.
Hiriburuka, aldeak handiagoak izan dira; izan ere, ADR 212,9 eurora iritsi da Donostian, 138,0 eurora Bilbon eta 88,2 eurora Gasteizen. 2024ko abuztuan, gela eskuragarriko batez besteko diru-sarrerak 123,5 eurokoak izan dira Euskal AEko hotel-establezimenduetan, aurreko urteko hil berean baino % 3,8 handiagoak.
Aste Nagusia
Abuztuan, hiru euskal hiriburuek herriko jaiak edo aste handiak ospatzen dituzte. Gasteizko hotel-establezimenduetan, Andre Maria Zuriaren jaietan (abuztuaren 4tik 9ra) 9.181 sarrera eta 20.317 gaualdi zenbatu dira, aurreko urteko aldi berean erregistratutakoak baino % 0,7 eta % 7,3 gehiago.
Era horretako establezimenduetako okupazio-maila % 78,0koa izan da aurtengo jaietan, plazen arabera neurtuta, eta % 90,8koa logelen arabera.
Donostiako Aste Nagusia 2024ko abuztuaren 10etik 17ra bitartean ospatu da. Aldi horretan 27.258 sarrera eta 65.722 gaualdi erregistratu dira guztira. Aurreko urteko Aste Nagusiaren aldean, sarrerak (% 1,5) eta gaualdiak (% 5,3) igo egin dira. Okupazio-maila % 88,5ekoa izan da plazen arabera neurtuta, eta % 94,3koa logelen arabera neurtuta.
Azkenik, 2024ko abuztuaren 17an eta 25ean Bilboko Aste Nagusia ospatu da. Bertan, hiriko hotel-establezimenduetako sarrerak 36.054 izan dira eta gaualdiak 75.907. Aurreko urtean ikusitakoekin alderatuta, bi zifrak jaitsi egin dira: % 1,9 sarreren kasuan eta % 2,4 gaualdien kasuan. Plazakako betetze-maila % 81,9koa izan da eta gelakako betetze-maila % 88,6koa.