NEXUS “Where Navarra meets Europe” jardunaldiak, ADItech fundazioak (Nafarroako I+G+B sistemaren koordinatzailea) antolatutakoa, Nafarroako I+G+B Sistemako (SINAI) eragileak, entitateak, start up-ak, Foru Komunitateko enpresak eta Europako espazioaren ikuspegia partekatzen duten beste herrialde batzuetako gonbidatuak hartu ditu gaur goizean, Iruñeko Baluarten. Nafarroako Gobernuko bigarren lehendakariorde eta Memoria eta Bizikidetzako, Kanpo Ekintzako eta Euskarako kontseilari Ana Ollok, jardunaldi honen hirugarren edizioaren amaieran nabarmendu duenez, “Nafarroak ahalmen handia du I+G+Bko europar proiektuetan parte hartzeko eta proiektu horien buru izateko”. Eta ECIV (European Circular Innovation Valley) proiektu europarra izan du hizpide, Nafarroatik koordinatua “Europa iraunkor, moderno eta kohesionatu” baten alde.
NEXUSen (Kanpo Ekintzako Zuzendaritza Nagusiak finantzatutako ekitaldia) hirugarren edizio honen helburua da, batez ere, SINAIko enpresen eta eragileen arteko harremana sustatzea, partzuergoak sortzeko ideia edo negozio baten aurkezpen-formatu laburraren bidez (pitching session). Partzuergo horiek Europako proiektu bihurtu daitezke. Horrela, oraingo honetan 150 inskripzio baino gehiago izan dira, NEXUSen errekorra. Aurkezpen laburretan 23 erakundek hartu dute parte; horietatik zazpi SINAIko eragileak dira eta 16 enpresak; horietatik zazpik ez dute orain arte Europako proiektuetan parte hartu.
Era berean, Europako Batzordearen 2025-2027 lan-plana eta Europako proiektu arrakastatsu batzuk bertatik bertara ezagutzeko aukera izan da, proiektuak ez ezik, haien esperientzia ere partekatuz, proposamena prestatzetik finantzaketa lortu arte.
Memoria eta Bizikidetza, Kanpo Ekintza eta Euskara departamentuak Kanpo Ekintzako II. Plana prestatzen ari da
Ollo lehendakariordeak bi alderditan zentratu du bere hitzaldia. Lehenik eta behin, adierazi duenez, “NEXUSen hirugarren edizioa lortzeak adierazten du ekimen interesgarria eta emankorra dela berrikuntza teknologikoaren bezain garrantzitsua den sektore batentzat, Nafarroak asko baitu jokoan eta horretarako ahalmen handia baitu “. Ildo horretan, zenbait datu argigarri eman ditu, hala nola Foru Erkidegoa Berrikuntzaren Adierazleen Eskualdeko Koadroan (RIS) Berritzaile Indartsua edo “Strong Innovator” gisa kalifikatua izan den Espainiako lau eskualdeetako bat dela. Duela gutxi, Europak ere 100 eskualde berritzaileenetakoen artean sartu du Nafarroa, Berrikuntzaren Europako Agenda Berriaren barruan, eta, azkenik, Ekonomia Zirkularreko partzuergo garrantzitsu baten buru da”, 17 eskualde hartzen dituzten beste bederatzi herrialdetako bederatzi lurralderekin.
“Honek guztiak – gaineratu du Ollok- berretsi egiten digu sektore honen eta Europaren arteko lotura- eta dinamizazio-eginkizunaren garrantzia, Nafarroako Gobernuak, oro har, eta zuzentzen dudan departamentuko Kanpo Ekintzako Zuzendaritza Nagusiak, bereziki, aspalditik bultzatzen ari garena Kanpo Ekintzako Planaren esparruan, laster eguneratuko dena. Eta hori departamentuen arteko lankidetzari esker egiten dugu, baita ADItech-en lantaldearekin ere, haiekin dugun harremana sendotu baitugu hitzarmen berri bati esker”. Jardunaldian izan da, halaber, irabazi-asmorik gabeko fundazio honen zuzendari nagusia, Diego Garrido.
Ollo lehendakariordeak itxi du jardunaldia, eta Sergio Pérez Kanpo Ekintzako zuzendari nagusiaren hitzen ondoren, hainbat hitzaldi izan dira. Lehenik eta behin, Angela Ustárroz ADItech-eko Europako Programa eta Partenariatuen arduradunak Where Navarra meets Europe jardunaldiaren nondik norakoak azaldu ditu, eta Europan egoteak duen garrantzia eta europar proiektuetan parte hartzeak dakartzan onurak azpimarratu ditu. Ondoren, Montse Badía Europako politiketan adituak Europako Batzordearen 2025-2027 lan egitaraua aurkeztu du.
Ondoren, Eva Fontechak, Nafarroako Ganberako proiektuen arduradunak, nazioarteko partzuergoak eratzeko laguntzei buruz ere hitz egin du, IRIS EDIH. Eta, azkenik, hainbat arrakasta-kasu azaldu dira, hala nola LIKE-A-PRO (Daniel de la Puente Ranea, CNTAko Europako Proiektuen zuzendaria); PLAN4CET (Óscar Fernández, Nafarroako Gobernuaren Energia Planaren eta Europako Proiektuen ataleko burua); HyperCOG & Ekate (Jon Arambarri, ESTIA-Tech-ekoa) eta SUSTAINEXT (José María Pinilla Rosas, Head of Project Management, NATAC Group-ekoa) proiektuak.
Sareak eta Nafarroako Gobernuaren apustu estrategikoa
Gogoratu behar da NEXUS Horizonte Redes ekimenaren barruan dagoela, ADItech erakundeak koordinatuta eta Nafarroako Gobernuko Kanpo Ekintzako Zuzendaritza Nagusiak finantzatuta, 2020an hasi zenetik. Ekimen hau SINAIko eragileei eta enpresei Horizonte Europa (2021-2027) urte anitzeko Europako ikerketa-esparru-programarako prestatzearen garrantzia ezagutarazteko eta programa osoan haien parte-hartze jarraitua eta proaktiboa sustatzeko helburuarekin sortu da. Ekimen honen balioa SINAIko eragileen eta Nafarroako enpresen eskualde-interesak lotzen dituen lan-metodologia sendotzean datza. Izan ere, Bruselan konexioak ditu, eta Memoria eta Bizikidetzako, Kanpo Ekintzako eta Euskarako departamentuak ordezkaritza iraunkorra du, duela gutxi indartu dena.