Eusko Legebiltzarrak legez kanpoko aparteko orduen gaineko kontrola indartzeko eta enpresetan ordutegi-erregistro fidagarriagoak bermatzeko beharra defendatu du. Gainera, Lan Ikuskaritzari eskatu dio ikuskapen- eta zehapen-jarduerak areagotzeko, lan-arazo horri aurre egiteko.
EAJren, PSEren eta EH Bilduren babesa izan zuen eta PPren eta Voxen abstentzioa jaso zuen.
Testuan, Eusko Legebiltzarrak berretsi egiten du Eusko Legebiltzarraren osoko bilkurak 2022ko apirilaren 27an hartutako erabakia, eta berretsi egiten du Euskadiko enpresetan egindako aparteko orduen kopurua murriztea “bide positiboa eta beharrezkoa dela enplegua sortzeko, lan-baldintzen kalitatea hobetzeko, emakumeen eta gizonen arteko soldata-arrakala murrizteko eta zainketen kontziliazioa eta erantzunkidetasuna errazteko”. Gainera, uste du beharrezkoa dela “legez kanpoko aparteko orduen kontrolean eraginkortasun handiagoa bermatzeko neurriak” martxan jartzea, hala nola “enpresen ordutegi-erregistroen sistemak hobetzea, horien egiazkotasuna bermatzeko, legez kanpoko aparteko ordu horiek lan-eremuan arazo larria baitira”.
Ildo horretan, nabarmendu duenez, “enplegua suntsitzen dute, langileen lan- eta bizi-baldintzak prekarizatzen dituzte eta gizarte osoari iruzur egiten diote, ordaintzen ez diren aparteko orduen kasuan, gainera, lan-esplotazioko egoera onartezinak sortzen baitituzte”.
Eusko Legebiltzarrak adierazi duenez, komeni da “legez kanpoko aparteko orduak ikuskatzeko eta zehatzeko jarduerak areagotzen jarraitzea, eta, horretarako, Lan Ikuskaritzak berariazko jarduerak ezartzen jarraitzea ordutegiak, lanaldiak, lan-egutegiak eta aparteko orduak egokitzeko kontrolaren arloan”, eta “langileen deskonexio digitalerako eskubidearen bermean” aurrera egitea.
Halaber, Lan Ikuskaritzaren Kudeaketa Planaren 2025eko eguneratzean “ikuskaritzako funtzio publikoa gauzatzeko behar beste giza baliabide eta baliabide material indartzea” sartzea eskatu du.
Azkenik, Eusko Jaurlaritzari eskatu dio hurrengo Lan Baldintzen Inkestan azter ditzala “lanaldien ezaugarriak, ordutegiak, legezko eta legez kanpoko aparteko orduak, bai eta lan-, gizarte- eta familia-bizitza uztartzearekin duten lotura ere”.
Sumar aderdiaren kritikak
Jon Hernández Sumar alderdiko legebiltzarkideak Comisiones Obrerasek egindako azterlan bat aipatu zuen, eta honako hau ondorioztatu zuen: “Euskadi da ordaindu gabeko aparteko orduen ehuneko handiena duen autonomia-erkidegoa”. “Soldatetan eta kotizazioetan urtero herrialde honetan gertatzen den iruzurra da, eta, sindikatu honen kalkuluen arabera, 183 milioi euroko iruzurra izango litzateke”, zehaztu zuen. Hernandezek azpimarratu zuenez, “aparteko ordu horiek enplegua suntsitzen dute, enplegua banatzea eta sortzea saihesten dutelako”. Halaber, lanaldiaren nahitaezko erregistroa “huts egiten” ari dela adierazi zuen, enpresa askok “tranpa” egiten dutelako “legez kanpoko aparteko lanaldiak” izaten jarraitzeko.