Eusko Jaurlaritzak ostiral honetan, urtarrilaren 3an, irekiko du Hazitek programarako eskabideak aurkezteko epea. 93 milioi euro izango ditu programak, eta Euskadiko enpresetan Ikerketa eta Garapena (I+G) sustatzea du helburu.
Spri Enpresa Garapenerako Euskal Agentziak jakinarazi duenez, martxoaren 17ra arte onartuko dira programa horretan parte hartzeko eskabideak. Programa horri esker, industria-ikerketako edo garapen esperimentaleko proiektuak egin ahal izango dira, bai lehiakorrak bai estrategikoak, industria adimendunaren, energia garbien eta osasun pertsonalizatuaren arloetan. Bi kasuetan, ikuspegi jasangarria duten proposamenak lehenetsiko dira.
Bestalde, adierazi du ekimenak euskal industria indartzea bilatzen duela, enpresen I+Gko jardueraren bidez, eta, horrela, euskal produkzio-sarearen lehiakortasun globalari “modu erabakigarrian” laguntzea, “inpaktu ekonomiko handiko emaitzak” sortzeaz gain. Hori guztia Euskadirentzat estrategikoak diren espezializazio-eremuetan eta merkatutik hurbilen dauden I+G faseetan ardaztutako laguntzaren bidez gauzatu nahi dela gaineratu du.
Programak bi laguntza-ildo bereizi biltzen ditu, izaera lehiakorreko I+G proiektuetara eta izaera estrategikoko I+G proiektuen garapenera bideratuak. Lehenengoaren helburua da produktu, prozesu edo zerbitzu berriak garatzeko edo lehendik daudenak nabarmen hobetzeko industria-ikerketako edo garapen esperimentaleko proiektuak sustatzeko laguntzak ematea.
Industria-ikerketa
Industria-ikerketako proiektuen kasuan, dirulaguntza diruz lagundu daitezkeen kostuen % 40ra irits daiteke, ebaluazio-irizpideetan lortutako puntuazioaren arabera. Garapen esperimentaleko proiektuen kasuan, ehunekoa % 25ekoa da gehienez.
Hala ere, itzuli beharrik gabeko laguntzaren gehieneko zenbatekoa 500.000 eurokoa izango da erakunde onuradun eta urte bakoitzeko, eta proiektuaren aurrekontu osoak 100.000 eurotik gorakoa izan behar du urte bakoitzeko.
Diruz lagundu ahal izango dira, halaber, industria adimendunaren, energia garbien eta osasun pertsonalizatuaren arloetan estrategikoak diren ikerketa industrialeko eta garapen esperimentaleko proiektuak, “lankidetza publiko-pribatua sustatzen badute eta euskal ekonomian trakzio-efektua eragiten badute, ETEen esku-hartzea eta Horizonte Europa Programarako sarbidea erraztuz”, zehaztu du Sprik.
Horrela, “produktu, prozesu edo zerbitzu berriak edo hobeak lortzeko, izaera estrategikoko teknologia berriak integratzeko eta oinarri zientifiko-teknologikoko enpresa berriak sortzeko” I+G+b jarduerak bultzatuko dira.
Hori guztia “enplegua sortzera, euskal enpresa-sarea dibertsifikatzera eta enpresen lehiakortasuna hobetzera” bideratuta dagoela adierazi du. Enpresa eskatzaileak aurkeztutako proiektuaren aurrekontu osoa ez da 4 milioi eurotik gorakoa izango, eta gehienez ere hiru urtekoa izango da.
Halaber, Hazitek “emaitza positiboak” sortzen ari dela ziurtatu du, euskal enpresen artean “arrakasta esanguratsua” izan duten kasuekin. “Ikerketa industriala eta garapen esperimentala babestean, ezagutza berrien sorrera, teknologia estrategikoen integrazioa eta oinarri zientifiko-teknologikoko enpresa berrien prestakuntza bultzatu dira”, baloratu du.
Ikuspegi horrek, gaineratu duenez, “berrikuntza bultzatzeaz gain, enplegua sortu du, enpresa-ehuna dibertsifikatu du eta euskal enpresek merkatuan duten lehiakortasun globala hobetu du”.