Kriptomonetari muga jartzea eskatu du Europako Parlamentuak

Europako Parlamentuak atzo Europako Batzordeari eskatu zion muga jartzeko kriptomonetei, kontsumitzaileak babesteko nazioartean araudi bateraturik ez duen finantza-produktu baten arriskuetatik, bereziki, Donald Trumpen bigarren agintaldiak planteatzen dituen erronken aurrean. Izan ere, kriptodibisak legitimatu nahi ditu, eta, are gehiago, bat egin du bere irudiarekin. Hala jakinarazi zioten eurodiputatuek Magnus Brunner Barne Gaietarako eta Migraziorako komisario europarrari, Estrasburgoko Euroganberako egoitzan izandako eztabaidan. Horren harira, Markus Ferber Europako Alderdi Popularreko eurodiputatuak ohartarazi zuen Trumpek “bitcoinen erreserba estrategiko” bat eraiki nahi duela, “AEB kriptomoneten hiriburu bihurtzeko”, eta, bere ustez, horrek “agerian uzten du kontsumitzailearen babesa arriskuan jartzen duen nazioarteko arau-esparrurik ez dagoela”. “Saihestu ditzagun arautu gabeko mendebalde basatiaren aberrazioak: nazioarteko gutxieneko arau batzuk eskatzen ditugu; denontzako marko eta eredu izango den jarraibide bat nahi dugu”, adierazi zuen politikari alemaniarrak. Jonas Fernandez eurodiputatu sozialistak ere “gutxieneko estandarrak” ezartzeko beharra azpimarratu du, baina ezkor agertu da “Atlantikoaren beste aldean zer gertatzen den ikusita”, kriptomonetaren jaurtiketa Trumpengan konfiantza izateari uzteko mezu gisa ulertzen baitu.