Balenciaga ontziola gipuzkoarra eta Gondán asturiarra Østensjo Rederi (ØR) Norvegiako armadorearentzat azken belaunaldiko lau ontzi berri eraikitzeko aliatu dira, off-shore parke eolikoak eraikitzen eta mantentzen laguntzeko. Lau itsasontziek likido hidrogenatua erabiliko dute propultsio-erregai gisa, eta horrek “zero emisiorekin” nabigatzea ahalbidetuko die.
Bi ontziolak barne hartzen dituen Pymar patronalak jakitera eman duenez, “Gondánen eta Balenciagaren arteko ekintza bateratuak lankidetza du oinarri, eta komertzialki berritzailea da. Horrek eta know-how-ak ØR ontzi-enpresak eurengan konfiantza izatea eragin dute, bere asmo handiko proiektua gauzatzeko”. Operazioak lau itsasontzi hartzen ditu barne. 84 metroko luzera eta 18,60ko zabalera duten bi SOV (Service Operation Vessels), turbina eolikoen mantentze-lanei laguntza emango dietenak, eta bi CSOV (Commissioning Service Operation Vessels): azken horiek 88,30 metroko luzera eta 19,70eko zabalera dute eta parke eolikoak martxan jarri eta mantentze-lanak egingo dituzte.
Bakarrak bere klasean
Pymarreko iturriek adierazi dutenez, unitate horiek “bakarrak izango dira bere klasean”, aitzindariak izango baitira teknologia berritzaile bat txertatzen, eta horrek “etorkizun hurbilean zero emisioko operazioak ahalbidetuko ditu”, propultsio-iturri gisa likido hidrogenatua (LOHC) erabiltzeari esker.