Luke Uribe-Etxebarria Apalategi Eusko Legebiltzarreko legebiltzarkidea enpresen digitalizazioaren beharraz eta horrek dakartzan erronkez mintzatu da berriki argitaratutako iritzi artikulu batean. Aro digitalak ekarri dituen aldaketak eta horrek bizitzako arlo guztietan izan dituen ondorioak izan ditu hizpide adituak. Hala, iraultza industrial eta ekonomiko berri baten aurrean gaudela esan du, eta erronka handiak ere badituela gizarte osoarentzat.
Erronkak
Bere aburuz, COVID-19ak bete-betean sartu gaitu gizarte digitalizatu batean. Horren ondorioz, enpresek negozio-ereduak birplanteatu eta digitalizatu behar izan dituzte; izan ere, enpresa bat gainerako lehiakideengandik bereizten duena kultura digitala sortzeko duten ezagutza da.
Adituaren esanetan, Ekonomia Digitalean integratzeak hainbat erronka planteatzen ditu. Azaldu duenez, lehenengoa herritarren, enpresen edo administrazioen datuak modu seguruan biltegiratzeko gaitasuna da. Horretarako, Europako Batzordeak Europar Batasunean sortzen diren datuak gordetzeko plataformaren sorrera bultzatu nahi duela dio, AEBk eta Txinak arlo horretan duten nagusitasunari aurre egiteko eta, besteak beste, Amazon, Google eta Microsoft erraldoiekiko mendekotasuna hausteko.
Bigarren erronka zibersegurtasuneko estrategia bat sustatzea da, ETE-en datuak salbu egon daitezen. Halaber, azpimarratu du beharrezkoa dela zibersegurtasunaren sektorea negoziorako eta hazkunde ekonomikorako aukera gisa aprobetxatzea.
Hirugarrena administrazioek araudi bat garatzea da, mundu digitalak hazkunde handiagoa izan dezan eta enplegua sor dezan.
Azkenik, esan du laugarren erronka lan-eskaintza eta -eskaria egokitzea dela, datozen aldaketetara egokitutako hezkuntzaren bidez. Ekonomia digitalaren testuinguruan, lana berriro definitu eta etorkizuneko lan-indarrari lagundu behar zaio.