Industria, Trantsizio Ekologiko eta Digital Enpresarialeko Departamentuak, Trantsizio Energetikoko Zerbitzuaren bitartez, beste lau ebazpen ebatzi ditu, guztira 4,3 milioi euroko emakida, 903 espedienteren artean banatuta. Zenbateko hori honela banatzen da: ibilgailu elektrikoak erostera bideratutako espedienteak (2.437.340 euro guztira) eta Nafarroako geografia osoan karga-puntuak jartzera bideratutakoak (1.869.486 euro guztira).
2021ean deialdia hasi zenetik, ibilgailuak erosteko 3.829 eskabideri eta kargatzeko guneak instalatzeko 3.166 eskariri erantzun zaie: 18,4 milioi euro eman dira ibilgailuak erosteko, eta 12,3 milioi, berriz, kargatzeko guneetarako. Guztira, 30,7 milioi euro eman dira.
2024ko abenduaren 31ra arte aurkeztutako espedienteak Europako MRR funtsekin ordaindu dira. Hala ere, 2025eko urtarrilaren 1etik aurrera eskatu diren espediente guztiak IDAEren (Energia Dibertsifikatzeko eta Aurrezteko Institutua) funtsekin ebatziko dira, MOVES III Planaren zabalkuntzaren barruan. Aurreikuspenen arabera, ekainean 30 bat eskaera itxiko dira, oraindik irekita daudenak, eta, horrela, ebazteko eta emateko prozesua amaituko da.
Onartutako emakida duten espediente guztiek ahalik eta lasterren aurkeztu behar dituzte justifikazio-agiriak, sarrera-ordenaren arabera ebazten baitira, eta dokumentazio hori zenbat eta lehenago aurkeztu, orduan eta lehenago jaso ahal izango dute dagokien ordainketa.
MOVES III Plana zabaltzea
Joan den apirilaren 2an, Gobernu Zentralak MOVES III berraktibatu zuen, 400 milioiko aurrekontuarekin. Handitze honek 7.000 eurorainoko laguntzak eskaintzen ditu turismo % 100 elektrikoak erosteagatik, eta 9.000 eurorainokoak ibilgailu komertzialak “zero emisio” erosteagatik. Laguntza hau 2025eko abenduaren 31ra arte eska daiteke, atzeraeraginezko izaera du eta aurtengo urtarrilaren 1etik aurrera erositako ibilgailu guztiei aplikatzen zaie.
Laguntza horiek pertsona fisikoek, profesional autonomoek, jabeen erkidegoek, pertsona juridikoek, sektore publikoak eta beste erakunde batzuek eska ditzakete esteka honetan.