Inpaktu-inbertsioa eta ekintzailetza soziala ez dira moda bat: ekonomia jasangarriago eta inklusiboago baten motor gisa finkatzen ari dira
Europan, 80.000 milioi eurotik gorakoa da jada merkatu hori, politika publikoek eta bere estrategiaren erdigunean gizarte- eta ingurumen-helburuak txertatuko dituzten negozio-ereduen eskaera gero eta handiagoak bultzatuta. Espainian, inpaktu-inbertsioa hirukoiztu egin da azken lau urteetan, eta 1.208 milioi eurora iritsi da, SpainNABen datuen arabera (2023). Horrek erakusten du inbertitzaileek, fundazioek eta finantza-erakundeek gero eta interes handiagoa dutela errentagarritasun ekonomikoa eta ingurumen-inpaktua konbinatzen dituzten ereduetan.
Bizkaian, eraldaketa hori ukigarria da. Gure lurraldea ekosistema dinamiko gisa finkatzen da ekintzailetza sozialaren eta inpaktu-inbertsioaren sustapenean, berrikuntza sozialarekin, garapen jasangarriarekin eta aukera inklusiboen sorrerarekin konprometitutako ekosistema bati esker, non eragile publikoek, pribatuek eta hirugarren sektorekoek asmo oneko ekimenak bultzatzen dituzten.
BBKn aspalditik sinesten dugu eredu horretan. Izan ere, ziur gaude lankidetza-ikuspegi horrek berrikuntza sustatzen duela, aliantza estrategikoak sendotzen dituela eta jasangarritasuna sustatzen duela, inpaktu positiboa eta iraunkorra duen ekintzailetza garatzeko ekosistema egokia eratuz. Horregatik, Garapen Jasangarriko Helburuekin bat datorren ekintzailetza sozialeko eta inpaktuko inbertsioko ekosistema bat sortzeko lan egiten dugu, ekintzaileei bidaiaren etapa guztietan lagunduz, inspiraziotik inbertsioraino.
Bidaia BBK Kunan hasi da, gizartean eragin positiboa izango duten irtenbideak irudikatzeko gunean. BBK Ekin-ekin jarraitzen du, non urtero 25 proiekturi laguntzen baitiegu inkubazio-fasean, negozio-eredu sendo eta jasangarriak eraikitzen lagunduz. Gero, BBK Arin dator, eta potentzial handiko bost enpresa azeleratu ditugu, modu pertsonalizatuan lagunduz eta 100.000 eurorainoko finantzaketa erraztuz. Gailurrean, BBK-k inbertsio sozialki arduratsuaren aldeko apustua egiten du, gure ekonomia eraldatzen ari diren enpresa berritzaile eta teknologikoak finantzatuz. Izan ere, BBKn ez ditugu ideiak soilik babesten, hazi egiten ditugu.