Industriaren, Trantsizio Ekologikoaren eta Enpresa Trantsizio Digitalaren Departamentuak baldintza-agiri bat argitaratu berri du, aholkularitza-enpresa bat kontratatzeko, sailari laguntzeko 2026-2030 aldirako Nafarroako Industria eta Enpresa Sustapen Plana egiten eta hura hedatzeko estrategia definitzen.
Plan berri hori industria-arloko politikak planifikatzeko eta koordinatzeko funtsezko tresna izango da, Nafarroako Espezializazio Adimenduneko Estrategiaren (S4) garapenaren esparruan.
Kontratuak formalizatzen denetik 2026ko urriaren 31ra arte iraungo duela aurreikusten da, eta lizitazioaren gehieneko zenbatekoa eta kontratuaren balio zenbatetsia 194.000 euro dira (BEZik gabe).
Lizitazio-prozesu honetan parte hartu ahal izango dute jarduteko gaitasun osoa duten pertsona natural edo juridiko espainiar nahiz atzerritarrek, kontratatzeko debeku edo bateraezintasunen bat ez dutenek, interes-gatazkarik ez dutenek eta eskatutako kontratu-prestazioa gauzatzeko kaudimen ekonomiko, finantzario eta tekniko edo profesional nahikoa egiaztatzen dutenek.
Interesdunek informazio gehigarria eskatu ahal izango dute Kontratazioaren Atariaren bidez.
Hazkundea, eraldaketa digitala eta ekologikoa
Industria Plan berriaren helburua da Nafarroako industria Foru Komunitateko politika sozioekonomikoaren ibilbide-orriaren erdigunean kokatzea, industria-enpresen hazkundea eta eraldaketa bikoitza (digitala eta ekologikoa) indartuz.
Hori lortzeko, proiektu eraldatzaileak abian jartzea, nitxoko jarduera ekonomiko berriak sortzea/erakartzea eta ekosistema industriala lehentasunezko balio-kateen inguruan indartzea bultzatuko da, pertsonak politiken erdigunean jarriz.
Aurreko Industria Plana (2021-2025)
2025ean, 2021-2025 aldirako Industria Plana amaitu zen. Horren bidez, oinarriak ezarri ziren Nafarroako industriak etorkizuneko erronka eta desafio berriei aurre egin ahal izateko, COVID-19aren pandemiak sortutako egoeraren ondoren, Nafarroako industriaren eta lurraldearen berezitasunak kontuan hartuta.
Urte horietarako diseinatutako planak hiru jarduera-helburu zituen:
– Nafarroako industriaren hazkundea eta garapena babestea, bai eta beharrezkoa den eraldaketa digitala eta ekologikoa ere.
– Lehentasunezko balio-kate industrialetan nitxo-jarduera ekonomiko berriak sortzen edo erakartzen laguntzea.
– Lehentasunezko balio-kateen Nafarroako industriaren hazkundea, finkapena eta eraldaketa laguntzeko ekosistema industriala indartzea.