Euskal enpresa-ordezkaritza bat bisitari da aste honetan herrialde horretan, Basque Trade lagun, industria horretako eragile estrategikoekin harremanak sendotzeko helburuarekin
Txinak aireontziak fabrikatzeko gaitasuna handitzen eta industria-kate propioa eraikitzen jarraitu du, eta datozen 15 urteetan munduko abiazio-merkaturik handiena izango dela aurreikusten da. Testuinguru horretan, COMAC, herrialde hartako aeronautika arloko jatorrizko ekipoen fabrikatzaile (OEM) nagusiak, aurrera egin du ARJ21 eta C919 hegazkin komertzialen programekin, baita C929aren garapenarekin ere, maila globalean eragile garrantzitsuenetako bat izanik.
Merkatu hori sakon ezagutzeko asmoz, euskal enpresa-ordezkaritza bat dago bisitan Txinan aste honetan, SPRI Taldeari atxikitako Basque Trade & Investment (Basque Trade) nazioartekotzeko agentziak antolatutako enpresa-misio baten barruan. Helburua da lurraldeko konpainien parte-hartzea bultzatzea eta sektore honetako Txinako eragile estrategikoekin harremanak erraztea.
Ordezkaritzan honako euskal enpresak daude: Aernnova, Tubacex, Ibarmia, GH Cranes & Components, Couth, Ona, Soraluce S. Koop, Glual, MCC, Tecnalia, Fagor Automation eta Trimek. Guztiak Basque Trade Txinako lantaldeak lagunduta arituko dira, Nagore Bonilla agentziako presidenteordea eta Yuete Ye Wu bulegoko zuzendaria buru dutela.
Goi-mailako harremanak ezartzeko aukera
Misioaren bidez, euskal enpresei aukera eskaintzen zaie COMACekin —bere hornitzaile nagusia den AVIC Tier 1ekin— eta aireko mugikortasun elektrikoaren (eVTOL) ekosistema berritzailearekin goi-mailako harremanak ezartzeko; horretarako, agendak hiru jardunaldi aurreikusten ditu hiru hiritan: Shanghai (COMAC), Wuhu (eVTOL sektorea) eta Shenyang (AVIC), eta programa horrek hitzaldi tematikoak, mahai-inguruak, B2B bilerak eta COMAC, AVIC eta eVTOL sektoreko enpresen instalazioetara bisita gidatuak barne hartzen ditu, hornidura-kateari, aeronautikako ekoizpenari eta aireko mugikortasun elektrikoari buruz.
Basque Tradek Shanghaiko bulegoan etengabeko presentzia du Txinan, eta bertatik arreta pertsonalizatua eskaintzen die dagoeneko herrialde horretan lanean ari diren enpresei eta bertan sartu nahi dutenei, aholkularitza estrategikoa eta negozio-aukerak identifikatzeko laguntza eskainiz.