Bi enpresek hitzarmen bat sinatu dute eguzki- eta elektrizitate-propultsioa garatzeko, aisialdiko ontzien industria deskarbonizatzea helburu
Tecnalia zentro teknologikoak eta eguzki zein energia elektriko bidezko ontziak garatzen dituen Lasai Marine enpresak lankidetza hitzarmen berria sinatu dute, aisialdiko ontzientzako propultsio iraunkorreko teknologiak garatzeko xedez. Bi erakundeen arabera, elkarlan honek elektro-mugikortasunaren arloan berrikuntza nabarmenak ekarriko ditu, besteak beste, eguzki-energiaren aprobetxamendua handitzea eta itsasontzien pisua arintzea.
Lankidetza horren testuinguruan garatzen ari diren proiektuetako bat Se-Boat da, zero emisio dituzten aisialdiko ontzien Europako merkatuan erreferente bihurtzea helburu duena. Proiektu honen ikerketa-ildo nagusiak honako hauek dira: propultsio elektrikoa, energia biltegiratzea, jasangarritasuna eta ontzien egitura. Eusko Jaurlaritzaren Hazitek programaren bidez babestutako I+G proiektua da, eta bertan parte hartzen dute Lasai Marinek eta Tecnaliaz gain, Supsonik, Masermic, Birziplastic, Quimibber, Cidetec, Mondragon Goi Eskola Politeknikoa eta Gaiker erakundeek.
Lasai Marineko zuzendari Gari Telleriak azpimarratu duenez, Tecnaliarekin sinatutako akordioak jauzi garrantzitsua dakar: “Eguzki-panelek energia gehiago jasoko dute, eta ontziek kontsumo txikiagoa izango dute, dentsitate handiko baterien eta material arinen erabilerari esker”. Bestalde, Pablo Prieto Tecnaliako ordezkariak nabarmendu du elektrifikazioa “itsas sektorea deskarbonizatzeko funtsezko bidea” dela, eta helburua dela teknologiaren bidez “nabigazio jasangarriagoa eta lehiakorragoa” lortzea.