Euskadiko Enpresa Kimikoen Elkarteak lankidetza hitzarmena sinatu du euskal ikerketa zentroarekin, “industria kimikoan berrikuntza sustatzen laguntzeko eta deskarbonizazioan aurrera egiteko”
Euskadiko Enpresa Kimikoen Elkarteak (AVEQ-KIMIKA) eta Tecnaliak bat egin dute industria kimikoan berrikuntza bultzatzeko. Horrela, bi enpresek lankidetza hitzarmen bat sinatu dute “industria kimikoan berrikuntza sustatzen laguntzeko eta deskarbonizazioan aurrera egiteko”. Prentsa ohar batean adierazi dutenez, akordioa ezaugarri aurreratuak dituzten produktu kimikoen garapenean zentratzen da bereziki, dauden fabrikazio prozesuak optimizatzeaz, prozesu, produktu eta zerbitzuak digitalizatzeaz, ekonomia zirkularra bultzatzeaz eta adimen artifiziala txertatzeaz gain.
Luis Blanco-Urgoiti AVEQ-KIMIKAko idazkari nagusiak azpimarratu duenez, “akordio hau funtsezkoa da gure enpresa elkartuetan berrikuntza sustatzeko, produktu berrien garapena eta fabrikazio prozesuen hobekuntzak bultzatuz”. Gaineratu duenez, “sektorearen deskarbonizazio erronka erabakigarriei elkarrekin heltzeko, Ekonomia Zirkularraren hedapenean aurrera egiteko eta elektrifikazioak eta energia alternatiboko iturrien erabilerak ematen dituen aukerak aztertzeko aukera emango digu. Urrats estrategiko horrek euskal industria kimikoaren aurrerapen-bidea sendotzen du”.
2.000 milioi euroko inbertsioa
Jose Luis Elejalde Tecnaliako Energia, Klima eta Hiri Trantsizioko zuzendariak azaldu duenez, “lankidetza funtsezkoa da gure gaitasunak indartzeko. Horregatik, horrelako akordioak enpresen lehiakortasunerako bultzada dira. Eta hori da, hain zuzen ere, Tecnaliaren helburua, industriari laguntzea eta enpresen beharrak teknologiaren bidez lehiarako abantaila bihurtzea”.
Aliantzak sektorearen deskarbonizazioan aurrera egiteko estrategiak landuko ditu, eta energia eraginkortasunaren eta erregai fosilen ordezko energia iturrien integrazioaren arloko soluzioak aztertuko ditu.
Nabarmentzekoa da 2024an sektoreak 2.000 milioi euro inbertitu zituela guztira, eta, zehazki, inbertsio horren % 24 berrikuntzara eta hobekuntza teknologikoetara bideratu zela. Euskal sektoreak 7.300 milioi euro inguruko urteko negozio-zifra sortzen du, eta Euskadiko BPG industrialaren % 13 da, industria-inbertsioaren % 12 izateaz gain.
Bi enpresen arteko akordio horrekin, AVEQ-KIMIKAk eta Tecnaliak industria kimikoarentzat etorkizun “berritzaileagoa eta jasangarriagoa” bultzatzeko konpromisoa hartu dute, “teknologia eta praktika jasangarriago eta eraginkorragoak hartzeko” erreferente gisa duten posizioa sendotuz.