Bere MELISA plataformak hamaika aukera eskaintzen ditu azterketa biomolekularrean
Taldeki Biosolutionsek urrats berria egin du metal-proteina sentsore hibridoen belaunaldi berri baten garapenean, antigorputzak eta biomarkatzaileak detektatzeko aukera ematen dutenak, eta horrela antigorputz tradizionalen zein ‘nanobody’-en alternatiba berritzaile eta eraginkorragoa eskainiz. “Gure teknologiarekin, egonkorrak, erreproduzigarriak eta kostu txikiagoko proba diagnostikoak azkar sortzea posible da”, azaldu dute enpresatik. Gainera, Eusko Jaurlaritzak SPRI Taldearen bidez eta Euskadiko Arrisku Kapitalaren sostenguarekin, Basque Tek Ventures ekimenaren bitartez, babesa jasotzen du.
Spin-off honek antigorputzak detektatzeko eta gaixotasun desberdinak diagnostikatzeko irtenbideak garatzen ditu. Horretarako, Aitziber L. Cortajarena, Ikerbasqueko irakaslea eta CIC biomaGUNEko zuzendari zientifikoa buru izan duen hamarkada bateko ikerketa zientifiko sendoan oinarritutako teknologia patentatua baliatzen du.
Proiektu nagusia
Taldekiren ikerketa proiektu nagusietako bat MELISA plataforma da, biomolekulen identifikazioan abantaila nabarmenak eskaintzen dituena. Besteak beste, azpimarratzekoa da antigorputzetan oinarritutako metodo klasikoekin alderatuta eskaintzen duen egonkortasun handiagoa, fidagarritasuna eta diseinu-malgutasuna, baita “ekoizpen azkar eta errentagarriarako gaitasuna” ere, konpainiaren hitzetan.
Horrez gain, teknologia berritzaile honen erabilera potentziala zabala da: antigorputzak, antigenoak, proteinak eta baita zelula kantzerigenoak ere detektatzeko balio dezake. “Gure helburua nahasmendu autoimmuneetan eta gaixotasun bakoitzari lotutako autoantigorputzen detekzioan zentratzea da, pazienteen diagnostikoa eta estratifikazioa errazteko”, adierazi dute.
Proiektu honen gidaritzan Pablo Ferró, enpresako CEOa, eta Aitziber L. Cortajarena daude. Ferró ekintzaile esperientziaduna da, 14 urte daramatza enpresak sortzen, Kimikako masterra du eta bost argitalpen zientifiko zein zazpi patenteren egilea da. Cortajarena, bestalde, biokimikan doktorea da, Ikerbasqueko ikertzaile-irakaslea eta CIC biomaGUNEko zientzia-zuzendaria.