Bilera BasqueTradek São Paulon duen bulegoak antolatu du, eta agentziak euskal enpresei Brasil bezalako merkatu estrategikoetan ematen dien laguntzaren barruan kokatzen da
Brasilen presentzia duten hemezortzi euskal enpresa elkartu dira São Pauloko Basque Trade & Investment (BasqueTrade) bulegoan, datozen urteetan euren jardueran eragin zuzena izango duten bi gai nagusi aztertzeko: Europar Batasunaren eta Mercosurren arteko Merkataritza Askeko Itunaren ondorio posibleak, eta 2026tik aurrera indarrean sartuko den Brasilgo zerga-erreforma.
Ekitaldian parte hartu du Damian Lluna, Europar Batasunaren Brasilgo ordezkaritzako merkataritza eta nekazaritza kontseilariak, akordioaren alderdi teknikoak azalduz eta euskal ekonomiako sektore estrategikoetan izan ditzakeen muga-zergen ondorioak aztertuz. Bestetik, Flavia Loss de Araujo, São Pauloko Unibertsitateko Nazioarteko Harremanetan doktorea, Mercosurren ikuspegi lokala eta estrategikoa ekarri du, egungo egoera geopolitiko eta arantzelarioa kontuan hartuta, Lula da Silvaren gobernuak ituna berretsi eta martxan jartzeko aukeren inguruan.
Brasilgo zerga-erreforma
Halaber, jardunaldian zerga-erreforma berria izan da hizpide: egungo sistema konplexua ordezkatzeko, ELGAk gomendatutako kontsumoko BEZa ezarriko du Brasilgo Gobernuak. Neurri horrek erronka handiak ekarriko dizkie atzerriko enpresei, eta 2026 baino lehen fakturazio-sistemak egokitu beharko dituzte eragiketen jarraitutasuna bermatzeko.
Topaketak networking tarte batekin egin du amaiera, bertaratutako enpresen, adituen eta BasqueTrade Brasileko taldearen arteko harreman zuzena eta esperientzien elkartrukea ahalbidetuz.
Ekimen hau BasqueTradek São Paulon duen bulegoak antolatu du, euskal enpresei Brasil bezalako merkatu estrategikoetan laguntzeko duen misioaren barruan, nazioartekotzean eragina izan dezaketen merkataritza- eta erregulazio-aldaketak aurrez identifikatuz.