Bilboko Udalak instalazio fotovoltaiko bat bultzatu du, bidean integratua eta ingurumen inpaktu minimoarekin, Artxandako funikular historikoan
Omexomek, eguzki-autokontsumoan aditua den Vinci Energies Spain enpresaren markak, Tecuni izenez ezaguna eskualdean, Artxandako funikularraren trenbideko 25 metrotan integratutako modulu fotovoltaikoen proiektu berritzaile bat jarri du abian, 2,7 kWp potentzia instalatuarekin. Proiektua lehendik dagoen elektrizitate-sorkuntzan integratuko da, eta, gainera, teknologia horrek azpiegitura mota horretan duen portaera egiaztatzeko balioko du.
Proiektu hau Artxandako Funikularraren eraginkortasun energetikoaren estrategiaren parte da. Estrategia horren helburua, karbono aztarna murriztea eta kontsumo eredu jasangarriago eta buruaskiago baterantz aurrera egitea da. Omexomek prozesu osoa garatu du, bideragarritasun azterketatik hasi eta sistema martxan jarri arte, efizientzian, segurtasunean eta hiri integrazioan estandar altuenak betetzen direla ziurtatuz.
Ander López Allende Funikularreko zuzendariordearen arabera, “trenbidean integratutako moduluari esker, trenbide-instalazioen kanpoko eremuak energia sortzeko espazio bihur daitezke, erabilera mugatu gabe. Teknologia horri esker, energia-kontsumoa nabarmen murriztuko da, eraikigarritasunari eragin gabe”.
Bestalde, Celestino Gomezek, Omexomeko proiektu buruak, adierazi zuen jarduera horrek “irtenbide energetiko jasangarriekin dugun konpromisoa islatzen duela, komunitatearen eta haren ingurunearen beharrei erantzun berritzailea emateko gai direnak, eta, aldi berean, trantsizio energetikoan aurrera egiten laguntzen digutenak”.
Trenbide inguruneetarako soluzio bat
Aplikatutako teknologia zero emisioko eraikinak (ZEB) garatzeko estrategiaren barruan kokatzen da, eta eskakizun hori 2028tik aurrera nahitaezkoa izango da Europar Batasun osoan eraikin publikoen kasuan, eta 2030etik aurrera eraikuntza berri guztientzat, 2024/1275 (EB) Zuzentarauaren arabera.
Izpitekek egokitutako konpositezko eguzki moduluak sartzeak aukera ematen die Bilbo bezalako hiriei etorkizuneko araudiei aurrea hartzeko eta hiri jasangarritasunean erreferente gisa duten posizioa indartzeko.
Izpiteken proposamena alternatiba disruptibo eta moldakor gisa aurkezten da trantsizio energetikoaren prozesuan. Hirigune- eta industria-azalera bereziak aprobetxatzeko duen gaitasunak – normalean gutxiegi erabiltzen direnak – eraikinen sorkuntza berriztagarria osatzen du, beste energia-iturri batzuekiko mendekotasuna murriztuz, ageriko azpiegitura gehigarrien beharrik gabe, hala nola ohiko eguzki-estalkiak edo kanpoko parke fotovoltaikoak. Ezaugarri horrek bereziki baliotsua bihurtzen du hiri ingurune trinkoetan, non espazioa optimizatzea funtsezkoa den.