Gipuzkoako enpresak CNC tornu horizontalak eta prozesu anitzekoak diseinatu eta fabrikatzen ditu, tamaina handiko eta doitasun handiko piezak mekanizatzeko; eta ekoizpenaren % 95 esportatzen du
70 urte baino gehiagoko esperientzia du CNC tornu horizontalak eta multiprozesuak fabrikatzen, eta, gaur egun, Geminis Lathesek nazioarteko bokazio nabarmena du. “Gure ekoizpenaren % 95 esportaziora bideratzen da, eta presentzia du munduko industria merkatu nagusietan”, nabarmendu du Edorta Arrietek, Geminis Latheseko marketin zuzendariak.
Alde horretatik, presentzia sendoa du Europan, Amerikan, Asian eta Ozeanian. Orain, gaitasun handiko mekanizazio soluzioen eskaera handia dagoen India eta AEBko merkatuetan duten posizioa indartzen ari dira. Enpresak CNC tornu horizontalak eta multiprozesuak diseinatu eta egiten ditu, tamaina eta doitasun handiko piezak mekanizatzeko. Makina erreminta horiek osagai metalikoei forma ematen diete torneaketa, fresaketa, mandrinaketa edo artezketa prozesuen bidez. Funtsezkoak dira sendotasuna, doitasuna eta fidagarritasuna behar diren industria sektoreetan.
“Urtean 40 makina inguru fabrikatzen ditugu, guztiak bezero bakoitzaren behar espezifikoen arabera diseinatuta eta konfiguratuta”, adierazi du euskal konpainiako ordezkariak. Bere ekipoek 6 eta 150 tona arteko piezak mekanizatzea ahalbidetzen dute, 1 eta 28 metro arteko luzerekin eta 4 metro arteko iraulketa diametroekin.
Hiru produktu-lerro
Gaur egun, enpresak hiru produktu-lerro nagusi ditu. Alde batetik, GMi lerroa, torneaketa, fresaketa, mandrinaketa eta artezketa eragiketak integratzen dituzten prozesu anitzeko tornuak sortzen dituena, gailuen eta erreminten aldaketa automatikoari esker. Eraginkortasuna, doitasuna eta mekanizazio denborak hobetzen dituen enpresako produktu izarra.
Bestalde, GTi linea, gaitasun eta doitasun handiko CNC tornu horizontalak sortzen dituena. Azkenik, hirugarrena Gri da, trenbideko osagaiak mantentzeko berariaz diseinatutako ekipoak, hala nola ardatzak eta gurpilak.
Geminis Lathesen makinak pieza kritikoen mekanizazioan erabiltzen dira, hala nola ardatzak, gurpilak, arrabolak, turbinen osagaiak edo tamaina handiko egitura metalikoak. Eta zehaztasun eta sendotasun handia behar duten sektoreetan dituzte aplikazioak, hala nola trenbidekoan, energian, itsasontzian edo petrolioan eta gasean.
Gipuzkoako enpresak 90 pertsonatik gorako plantilla du, eta urtean 35 milioi euro inguruko fakturazioa. “hazkunde jasangarrira, berrikuntza teknologikora eta nazioarteko hedapenera” bideratutako etorkizuneko estrategiari eusten dio, marketing zuzendariak aurreratu duenez.