Konpainiek Basque Companies in Türkiye: Market Experiences & Cooperation Opportunities topaketan parte hartu dute aste honetan Istanbulen, Turkiako Basque Trade & Investment bulegoak antolatuta
Turkian kokatutako bederatzi euskal konpainiatako ordezkariek topaketan parte hartu dute aste honetan. Jardunaldiaren helburua esperientziak partekatzea, negozio aukera berriak identifikatzea eta Euskadiren eta herrialde transkontinentalaren arteko harreman ekonomikoak indartzea izan zen.
Saioa Ecem Toprakseven Gülfidan Turkiako Basque Trade & Investment bulegoko zuzendariak inauguratu zuen, eta agentziak enpresei nazioartean hedatzen laguntzeko egindako lana aurkeztu zuen. Hitzaldian, herrialdean abian dauden proiektuak eta BasqueTradek Turkiako merkatuan dagoeneko ezarrita dauden konpainiei eskaintzen dien laguntza nabarmendu zituen.
Mustafa Erdönmez Turkiako Errepublikako Presidentetzako Inbertsio eta Finantza Bulegoko Jarduera Sektorialen arduradunak, berriz, Turkiako Gobernuak atzerriko inbertsioa erakartzeko eta babesteko duen estrategia azaldu zuen, indarrean dauden politikak, eskura dauden pizgarriak eta herrialdean jarduten duten enpresei zuzendutako laguntza zerbitzuak zehaztuz. Erakunde beretik etorrita, bulego bereko Kanpo Bulegoen Unitateko Proiektuen arduradunak, Ayاe Çerik, Türkiye Investment Office delakoaren kanpoko sareak nazioarteko inbertitzaileen sarrera errazteko eta tokiko erakundeekin koordinatzeko duen zeregina azaldu zuen, herrialdean ezartzea sendotzeko.
Jardunaldian, halaber, Juan Antonio Viñuales Martínez-Echevarría Abogados enpresako bazkideak parte hartu zuen, eta enpresek Turkian jarduteko kontuan hartu behar dituzten lege eta administrazio alderdiei buruzko ikuspegi praktikoa eman zuen.
Aurkezpenen ondoren, eztabaidarako gune bat ireki zen, non enpresek Turkiako merkatuaren erronka eta aukera nagusiei buruzko iritziak trukatu ahal izan zituzten, ingurune dinamikoa eta etengabeko bilakaeran dagoena. Jardunaldia networking saio batekin amaitu zen, non horrelako ekimenek enpresa aliantza berriak bultzatzeko eta Euskadiren eta Turkiaren artean lankidetza bideak irekitzeko duten garrantzia nabarmendu zen.