Arabako Foru Aldundiak eta Santa María la Real Fundazioak sustatutako ekintzailetzarako aholkularitza-programan parte hartu duten arabarrek beren negozio-proiektuak aurkeztu dituzte Gasteizko Bibat Museoko ekitaldi-aretoan. Guztira 23 pertsonak hartu dute parte azken hilabeteetan Araban autoenplegua sustatzea helburu duen programa honetan
Arabako Foru Aldundiko Enplegu, Merkataritza eta Turismo Sailak eta Santa María la Real Fundazioko Enplegu eta Gizarteratze Arloak kultura ekintzailea sustatzeko programa berri bat jarri dute abian 2025ean, negozio ideia bat abian jarri nahi duten pertsonei laguntzaeta orientazioa eskaintzeko.
Cristina González Enplegu, Merkataritza eta Turismoko foru diputatuak eta Elena Magaz Santa María la Real Fundazioko Enplegu eta Gizarteratze Arloko lurralde-koordinatzaileak, Demo Day presentzial honetan, parte-hartzaileek beren ideiak enplegu-aukera bihurtzeko ezagutzak eta trebetasunak eskuratzeko konpromisoa eta ahalegina aitortu dituzte, baita azaldutako proiektuen kalitatea ere. Elena Magaz ordezkariak nabarmendu duenez, programa horrek “Araban aukerak sortzea eta espiritu ekintzailea bultzatzea ahalbidetu du, egungo merkatuaren beharretara egokitutako negozioak sortzea sustatuz”.
Bost proiekturen aurkezpena
Programaren amaierako jardunaldian, berrikuntza eta parte-hartzaileen konpromisoa islatzen duten bost ekintzailetza-proiektu aurkeztu dira:
- Esperientzia interaktiboetara bideratutako bideo-jokoa.
- Zoru pelbikoa berreskuratzeko zentro bat, osasunera eta ongizatera bideratua.
- Entrenamendu pertsonaleko proiektu bat, kirolarien errendimendua hobetzeko.
- Arteterapia ekimen bat, artea osasun mentaleko arazoak dituzten gazteei arreta emateko tresna gisa erabiltzen duena.
- Ikastetxeetan irakasleei arreta emateko proiektu bat, haien ongizaterako laguntza eta baliabideak eskainiz. Halaber, errendimendua eta giroa hobetzea ikasgeletan.
Gainera, garatutako gainerako proiektuek askotariko sektoreak hartzen dituzte barne: ostalaritza, adinekoen arreta, 3D inprimaketa, marketin digitala, autokarabanen alokairua, turismoa, produktu izoztuen inportazioa, tratamendu estetikoetako prestakuntza eta hizkuntza akademiak, besteak beste. Programan parte hartu zutenek azaroan aurkeztu zituzten beren proiektuak, Demo Day batean, online formatuan, espezialisten panel baten aurrean.
Prestakuntzara bideratuta
Ekintzailetzari aholkularitza emateko programak prestakuntza-ibilbide bat eskaini du, % 100 online eta doakoa, espiritu ekintzailea sustatzeko eta parte-hartzaileak autoenpleguaren bidez lanpostu bat bilatzeko funtsezko gaitasunetan gaitzeko diseinatua.
Programak taldeko saioak eta banakako mentoretzak konbinatu ditu, negozio planaren garapenean laguntza pertsonalizatua eta proiektua definitzeko eskuratutako ezagutza guztien aplikazio praktikoan aholkularitza emateko. Gainera, ekintzailetzari aplikatutako tresna digitalen eta adimen artifizialeko tresnen erabilera ezagutzera eta ikastera bideratutako webinar batzuk jarri ditu parte-hartzaileen eskura.