Etxebizitzaren merkatua arautzeko neurri berriek konplexuagoa egin dute errentatzaileak eta maizterrak mugitzen diren esparrua. Iruñean eta eskualdean, besteak beste, tentsionatutako bizitegi-merkatuko zonak izendatu ondoren, logikoa da foru-gobernuak haien eginkizuna indartzea, arau horiek ulertzen eta aplikatzen lagunduko duen zerbitzu publiko baten bidez.
Hipoteken eta alokairuen arloko Informazio, Aholkularitza eta Bitartekotza Zerbitzu berriak aurreko ereduarekiko fokua zabaldu du, batez ere etxebizitza publikoan eta laguntzetan zentratuta. Orain merkatu osoa hartzen da kontuan, alokairu pribatua eta hipotekak barne, eta hor biltzen dira egungo zalantza asko. Alokairu pribatuan, adibidez, ohikoa da jendeak argi ez izatea zein kontratu sina dezakeen, zein prezio den legezkoa edo zein baldintza bete behar dituen aukeratutako etxebizitzak. Informazio falta horrek segurtasun falta eta ekidin litezkeen gatazkak sortzen ditu. Auzibidetik kanpoko bitartekaritza indartzeak arazo horiei auzitegietara iritsi aurretik heltzea ahalbidetzen du, akordio azkarragoekin eta kostu txikiagoekin.
Aldi berean, zerbitzuak laguntza eskaintzen die kalteberatasun-egoeran dauden pertsonei, askotan beren eskubideak ezagutzen ez dituztenei edo nora jo ez dakitenei. Gainera, tresna erabilgarria izan daiteke jabe txikiarentzat, araudia betetzeko eta segurtasun handiagoz alokatzeko babesa aurkitzen baitu, merkatu egonkorragoa eta gardenagoa lortzen lagunduz. Dena da abantaila.