Mikel Jauregi Industria sailburuak dei egin die euskal industriari, batez ere ETEei, “autokontsumorako laguntzak eskatu eta jaso ditzaten, inbertsioaren % 45erainoko dirulaguntza zuzenak jasotzeko aukera ematen baitie, eta horri % 35eko kenkari fiskala gehitu behar zaio”.
Sailburuak Schaefflerrek Elgoibarren (Gipuzkoa) duen lantegia bisitatu du ostegun honetan, 240 pertsonako plantillarekin eta errodamendu orratzen fabrikazioan espezializatuta, eta autokontsumo energetikoaren aldeko apustua nabarmendu du.
Bisitan, Jauregik Schaefflerren Elgoibarko instalazioak ezagutu ditu, “digitalizazio industrialean erreferenteak”. Jaione Ganzarain Teknologia, Berrikuntza eta Eraldaketa Digitaleko sailburuordearekin batera, ValentÃn Guisasolak, konpainiaren Espainiako Country Managerrak eta lantegiko zuzendaritzak egin diote harrera sailburuari.
Mikel Jauregik azpimarratu duenez, “autokontsumo energetikoa % 30 hazi da Euskadin, industriak bultzatuta”, eta euskal industria animatu du, batez ere ETEak, “autokontsumorako laguntzak eskatzera eta jasotzera, inbertsioaren % 45erainoko dirulaguntza zuzenak jasotzeko aukera ematen baitie, eta horri % 35eko kenkari fiskala gehitu behar zaio”. “Deskarbonizazioan inbertitzea ona da gure ekonomiarentzat, industria lehiakortasuna indartzen baitu”, amaitu du.
Schaeffler taldea
Elkarrekin bisitatu dituzte enpresaren instalazioak osatzen dituzten eremuak, eta bertatik bertara ezagutu ahal izan dituzte beren proiektu nagusiak, enpresa estrategia eta digitalizazioaren inplementazioa. Horrek esan nahi du ekoizpen makinak erabat konektatuta daudela sistema informatikoarekin, eta ahalmena dutela zer fabrikatu erabakitzeko, pieza berrirako beharrezkoak diren doikuntzak beren kabuz egiteko eta gidaririk gabeko garraio sistemak zuzentzeko.
Schaeffler Taldeak 120.000 langile eta 100 ekoizpen lantegi baino gehiago ditu mundu mailan, eta 2024an 18.200 milioi eurotik gorako salmentak lortu ditu. Estatu espainiarrean 388 pertsonako plantilla du, 240 pertsonako plantilla duen Elgoibarko ekoizpen lantegiaren eta Bartzelona eta Madrilgo salmenta egoitzen artean banatuta. Schaeffler Taldearen fakturazioa Espainian 650 milioi eurora iritsi zen 2024an.
Sailburuak nabarmendu duenez, Elgoibarko lantegiak “deskarbonizazioaren aldeko apustu garrantzitsua” egin du, 2020tik iturri berriztagarrietatik soilik datorren energia kontsumituta, 400 MWko autogenerazio fotovoltaikoko instalazio batekin.
Gainera, kontsumitutako altzairuaren % 75 Euskadiko hornitzaileei erosten die, eta horiek altzairu neutroa eskaintzen dute emisioetan. Sailburuak balioa eman dio “euskal industriak trantsizio digitala eta deskarbonizazioa gidatzeko egindako apustuari”. “Schaefflerren kasuan bezala, euskal industriak autokontsumo energetikoaren alde egindako apustua deskarbonizazioaren eta lehiakortasunaren alde duen konpromisoaren adibide da”, azpimarratu du.