Jose Mª Aierdi Nafarroako Gobernuko Landa Garapen eta Ingurumen kontseilaria eta Javier Berdejo Ebro Arroko Ureztatzaileen Federazioko presidentea Zaragozan izan dira gaur, astelehena, Ebro ibaiaren ibilguan zehar zabaltzen diren lur ureztatuetako nekazaritza-azpiegituren egoera aztertzeko.
Aldebiko bilera horretan, Aierdi sailburuak defendatu duenez, “klima-aldaketa eta uraren erabilera arrazionalagoa egiteko beharra premiatzen ari gara ureztatze-azpiegituren modernizazio-prozesua bizkortzeko, baldin eta nekazaritzaren etorkizunaren alde lan egin nahi badugu eta lehen sektore bizi, erresiliente eta lehiakor bat mantendu nahi badugu, zeina, gainera, landa-garapenaren arima eta palanka baita Ebrok ureztatzen dituen eskualde guztietan”.
Era berean, Nafarroako Landa Garapen eta Ingurumen sailburuak “ezohiko finantzaketarako formulak bilatu eta aztertzearen alde egin du, gobernu autonomikoek ureztatzeen etorkizunaren aldeko apustu irmoa egin dezaten eta, aldi berean, inbertsio horiek ureztatzaileen erkidegoentzat errentagarriak izan daitezen eta nekazaritzako elikagaien industria indartsuarentzat funtsezko laguntza izan daitezen”.
54.000 hektareetako ureztatze-azpiegiturak modernizatuz
Nafarroako kontseilaria buru izan duen ordezkaritzan, Ignacio Gil Foru Gobernuko Nekazaritzako zuzendari nagusiak eta Juan Pablo Rebolé Nekazaritza Azpiegituren Zerbitzuko zuzendariak ere parte hartu dute, eta Ebroko Ureztatzaileen Federazioaren egoitzan (Ferebro) bildu dira, Aragoiko hiriburuan, Javier Berdejo presidentearekin eta erakunde horretako gobernu batzordea osatzen duten hamabost kideekin.
Ferebrok Ebroko arro hidrografikoko ureztatzaile-komunitate guztiak biltzen ditu, eta bere gobernu-batzordea honako hauek osatzen dute: Errioxako, Aragoiko eta Kataluniako ureztatze-sistemen ordezkariek, Jose Maria Vinué, Miguel Legarre eta Miguel Murillo nafarrek, Bardea, Lodosa eta Tausteko ubideetako presidenteek, hurrenez hurren, eta Javier Jiménez eta Juan Carlos Fernández Corellako eta Ablitasko ureztatze-lanetako presidenteek, hurrenez hurren.
Nafarroako Gobernuak bultzatzen duen Ureztatzeen Foru Planak, zeinaren eguneraketak partaidetza publikoko prozesu bat garatu baitu hainbat herritan topaketak eginez, Foru Komunitateko 54.000 hektareatan ureztatze-azpiegiturak modernizatzea aurreikusten du, 900 milioi baino gehiagoko inbertsioarekin hurrengo bi hamarkadetan.