Kultura, Kirol eta Turismo kontseilari Rebeca Esnaolak Nafarroako turismoaren sektoreari buruz ezagutzen diren azken datuak partekatu ditu asteazken honetako Gobernu Bilkuraren ostean egindako prentsaurrekoan. Hala, nabarmendu du Erkidegoak lehen aldiz gainditu dituela establezimendu turistikoetan ostatu hartutako bi milioi bisitariak, 2.009.885 guztira, hau da, % 2,8ko igoera 2024arekin alderatuta.
Esnaolaren ustez, 2025eko sektore turistikoaren erradiografia osoak “hazkunde kontrolatua eta iraunkorra” aipatzen du, “konpromiso publiko-pribatutik” abiatuta. Sailburuak azpimarratu du datu horiek, neurri handi batean, nazioarteko turismoaren hazkundeak azaltzen dituela, % 3ko igoerarekin. “Iaz nazioarteko 700.000 turista inguruk bisitatu gintuzten”, zehaztu du, eta Nafarroarako funtsezko merkatuak Frantzia, Estatu Batuak, Erresuma Batua eta Asiako merkatua izan direla nabarmendu du.
Ekonomiari dagokionez, Esnaolak zehaztu du “turismoa motor ekonomiko gisa finkatu dela gure erkidegoan”, eta sektoreko zuzeneko gastuaren zifrak aipatu ditu, 2025ean 1.536 milioi eurokoak izan baitziren. Kopuru horri 2025eko 4. hiruhilekoan Erkidegoan izan ziren turista eta txangozaleen gastu-datuak gehitzea falta zaio, baina dagoeneko % 15eko hazkundea ekarri du 2024arekin alderatuta, parametro berberekin. Bestalde, bisitarien batez besteko gastua 149 eurokoa izan da pertsonako eta eguneko.
Enpleguari dagokionez, bestalde, 19.076 langilerekin amaitu da urtea, eta zertxobait gainditu da 2024ko abenduko datua (19.011). Maiatzean, serieko hilabeterik onenean, 20.206 afiliatuko zifra errekorra lortu zen, sektoreko 20.000 enpleguen muga ere lehen aldiz hautsiz.
Nazioarteko bisitariei dagokienez, Esnaola sailburuak azaldu du merkatu estatubatuarrak lotura handia izan duela enologiarekin eta gama altuko ostatu-gauekin lotutako “Premium” esperientziekin. Bestalde, Erresuma Batuko bisitariak “kultura-ekitaldiek eta mendi-ibiliek” erakarri dituzte, eta Done Jakue Bidea izan da Hego Koreako eta Japoniako bisitarientzat erakargarri turistiko nagusia.
Bisitari madrildarrak nagusi
Jatorri nazionaleko bisitarien artean, Ensaolak partekatu duenez, “bisitatzen gaituenaren bosten bat baino gehiago Madrildik dator, oporretako eta kongresuetako turismoaren igorle nagusia baita”, eta “Bartzelonako probintzia bidaiarien % 15,4 da, landa-turismoan eta gastronomian oso garrantzitsua”. Zehaztu duenez, bi gune nagusi horien artean daude, gainera, Euskal Autonomia Erkidegoa eta Zaragoza, Valentzia, Sevilla eta Alacant probintziak.
Bere hitzaldian, Esnaola sailburuak adierazi nahi izan du, datu objektiboez gain, Erkidegoa bisitatzen duten pertsonen artean ere “gogobetetze-maila handia” dagoela. Hala, jakinarazi du Nafarroa munduko hamar eskualde abegikorrenetako bat dela, bidaiarien Booking plataformaren bidez egindako balorazioen arabera. Kontseilariaren arabera, bereizketa horrek “Nafarroako abegikortasunaz eta gure eskaintzaren kalitateaz hitz egiten du”.
Zentzu horretan, Esnaolak iragarri du datorren apirilaren 8an jasoko duela errekonozimendu hori Foru Gobernuak erreserben plataforma horren eskutik, eta aurreratu du entrega Nafarroan egingo dela.