Azagra izan zen Nafarroako zainzuriaren kanpainari hasiera ofiziala eman zion herria. Denboraldiaren aldakortasuna dela eta, oraingoz “zalantzazkoa” dela diote. Izan ere, azken bi urteetako emaitza txarren ondoren, inor ez da 2026rako kopuruez hitz egitera menturatzen. Hori bai, eta Marcelino Etayo Nafarroako Zainzuria AGBko lehendakariarekin bat etorriz, “jaso ditugu lehenengoak, testigantza gisa bada ere. Beroak ilusioa piztu zigun, baina, hotzak berriro geldiarazi du dena”. Kanpainaren erregistroak ixtear daude, gaur egun, gutxi gorabehera 1.400 hektareatan lan egiten duten nekazaritza sektoreko 300 profesional baino gehiago daude; sei merkaturatzaile fresko daude, eta 31 kontserba enpresa, jatetxe eta kontsumitzaileei kalitate hobeko zainzuriak eskaintzeko lan egiten dutenak.
Datu horiek guztiak Nafarroako Lehen Zainzuriaren XV. Dastatzearen harira eman zituen, eta bertan izan ziren, besteak beste, Jose Mª Aierdi Landa Garapeneko eta Ingurumeneko kontseilaria, Unai Hualde Nafarroako Parlamentuko presidentea, Ruben Medrano alkate azagrarra, Erresuma Batuko jatetxeetako ordezkariak eta INTIAko teknikariak.
Kalitatea eta errotzea
Bere hitzaldian, Marcelino Etayok nabarmendu zuen, gainera, nekazaria gero eta kalitate handiagoko zainzuria sortzen ari dela. Elaboratzaileak, labore horren kalitatearekin eta tradizioarekin bat datozen prezioak ordainduta, eta administrazioak, gure lurraldean hain errotuta dagoen eta kanpainan zehar hainbeste lanpostu sortzen dituen labore horren babesa eta bereizketa zainduta. “Nahi dugu kontsumitzaileak jabetzea erosteko unean hartzen duten erabakiarekin nekazaritza eta elikadura sektore osoaren lana babesten eta landa garapena bultzatzen ari direla”, esan zuen.
Prezioari buruz hitz egin nahi izan ez bazuen ere, “gauza askok eragiten dute, eta, hasiera batean, aurten gehiago ordainduko da, bi kanpaina nahiko txarretatik gatozelako eta kontserbagileek zainzuri guztia atera dutelako eta stockik ez dutelako”.
Bestalde, eta 2025ean baino emaitza hobeak espero dituen Aierdiren arabera, “ekitaldi hau urruneko merkatuetatik datozen produktuekiko bereizten gaituen ekoizteko modu jakin baten aldarrikapena ere izatea gustatuko litzaidake: lur batean errotzea eta kalitate bereiziaren aldeko apustua. Hala egiaztatzen du aurreko kanpainan Nafarroan bildu ziren ia 3.000 tona zainzurien hiru laurdenak Adierazpen Geografiko Babestuak (AGB) ziurtatutako produktuak izateak, eta horrek jatorriaren eta kalitatearen bermea dakar”.
Kontseilariak defendatu zuenez, “balio kateko eragile guztiak gai izango gara Nafarroako zainzuriaren laborantza errentagarri egiteko, haren kalitateak, zaporeak, presentziak edo testurak ez baitute zerikusirik beste jatorri batzuetakoarekin”. Aldi berean, azpimarratu zuenez, “produktuaren tokiko jatorria eta trazabilitatea publikoak identifikatzen, aitortzen, baloratzen eta aukeratzen jakin beharko luke, kontsumo arduratsuaren aldeko konpromisotik abiatuta”.
Eta, amaitzeko, Medrano alkateak nabarmendu zuen “baratze hauek barazki onenak eskaintzen dizkiguten eremu batzuen aberastasunaren sinbolo direla, Nafarroako gastronomiaren abangoardia zainzuria ikur gisa hartuta. Hemen, gainera, nekazari gazte gehien dituen herria izateko ohorea dugu, eta, beraz, ezin dut aukera galdu eskerrak emateko eta haien meritua aitortzeko”.