Iruñeko Udalak gazte ekintzaileek enpresak sortzeko dirulaguntzen deialdia egin du berriro. Laguntzak 2025eko uztailaren 1etik 2026ko uztailaren 30era bitartean sortutako enpresei zuzenduta daude.
Ekimenak 60.000 euroko aurrekontua du guztira, eta eskaera-ordenaren araberako banakako ebaluazio bidez emango da. Baldintza zehatzak deialdiaren oinarrian kontsulta daitezke, udalaren webgunean.
Laguntza hauekin, Udalak gazteek Iruñean jarduera ekonomiko berriak sortu eta martxan jar ditzaten lagundu nahi du. Horretarako, 2.000 euro arteko dirulaguntza emango die pertsona fisikoei, sozietate zibilei eta nortasun juridikorik gabeko sozietate irregularrei, eta 3.000 euro artekoa nortasun juridikoa duten pertsonei. Zenbatekoa jarduera sortzeko eta abian jartzeko egindako gastuen % 70era artekoa izango da.
Zenbatekoa notaritza- eta erregistro-gastuak eta jardueraren irekierarekin edo hasierarekin lotutako beste gastu batzuk estaltzeko erabiliko da, hala nola bisita-txartelak, logotipoen diseinua, marka-irudia, web-orria, marka-erregistroa edo patentea. Halaber, jarduera hasi eta hurrengo hiru hilabeteetako alokairu-gastuak edo negozioa eskualdatzeko gastuak ordaindu ahal izango dira. Azkenik, aldizkako gastuak ere jaso ahal izango dituzte, hala nola Gizarte Segurantzako kuotak, nominak, lokaleko elektrizitate- eta ur-kontsumoa edo aholkularitza-gastuak. Gastu horiek guztiak Jarduera Ekonomikoen gaineko Zergan alta eman aurreko sei hilabeteen eta alta-dataren ondorengo hiru hilabeteen artean egindakoak izan beharko dira.
Laguntza horiek jaso ahal izateko, eskatzaileek 18 eta 35 urte bitartean izan beharko dituzte jardueraren hasiera-datan (Jarduera Ekonomikoen gaineko Zergan alta emandako data). Sozietate zibilen, irregularren, kolektiboen edo komanditako sozietate sinpleen kasuan, bai eta kapitaleko merkataritza-sozietateen, lan-sozietateen eta kooperatiben kasuan ere, gutxienez bazkideen edo kapitalaren bi herenek bete beharko dute adina. Kasu guztietan, jarduera ekonomikoaren zerga- eta negozio-egoitza Iruñeko udalerrian egon beharko da. Era berean, dirulaguntza jasotzen badu, jarduera gutxienez 18 hilabetez mantendu beharko du, EJZn alta ematen duenetik zenbatzen hasita.
Eskabideak urriaren 9ra arte aurkez daitezke
Eskaerak aurkezteko epea martxoaren 27an hasi eta urriaren 9an amaituko da. Eskaerak modu telematikoan aurkeztu beharko dira, Iruñeko Udalaren Egoitza Elektronikoaren bidez, edo aurrez aurre, Kondestablearen jauregian dagoen Erregistro Orokorrean eta haren erregistro osagarrietan. Ebazpena eskaera aurkeztu eta sei hilabeteko epean emango da.
Aurreko edizioan 52 laguntza-eskaera aurkeztu ziren. Generoaren arabera, eskatzaileen artean, 34 gizonak izan ziren eta 22 emakumeak. Horietatik guztietatik 40 jarduera ekonomikok jaso zuten dirulaguntza. Izan ere, jatorrizko aurrekontu-partida, 60.000 eurokoa, 12.974,96 euro gehiagorekin handitu behar izan zen eskabide guztiei erantzuteko. 32 pertsona autonomo eta zortzi sozietate izan ziren, horietako bat sozietate irregularra, hiru pertsona bakarreko sozietate mugatu, bi sozietate mugatu eta mikrokooperatiba bat.
Udalaren laguntza jaso duten negozioen artean daude ile-apaindegiak, argazki-estudioak, higiezin-zerbitzuak, igeltserotza-, aholkularitza- eta prestakuntza-negozioak, diseinu grafikoko jarduerak, irakaskuntza eta psikologia, loradendak, farmaziak eta salgaien garraioa, besteak beste.