Innkia Arrasateko startup bat da, adimen artifizialeko soluzio berritzaileak eskaintzen dituena. Aurrekontuaren % 75 inguru bideratzen du I+Gra.
Bind 4.0 programan parte hartzen du, Orona enpresa bultzatzaile dela, eta Ekintzaile programaren SPRI Taldearen laguntza jaso du, industrian ekintzailetza eta berrikuntza proiektuak bultzatzeko.
Enpresa 2025ean jaio zen “Adimen Artifizial Fidagarriko soluzio bereizgarriak garatzeko erronkarekin, denok IArekin bilatzen dugun inpaktu eraldatzaile, biderkatzaile eta jasangarria konfiantza izan dezakezunean bakarrik baita posible. Gure hiru bazkideen ikuspegi partekatuaren emaitza gara: Ikerlan zentro teknologikoa, Laboral Kutxa taldea eta Mondragon Korporazioa. Batasun horrek IAren teknologiak, merkatuaren benetako beharrak eta definitzen gaituen espiritu kooperatiboa uztartzen ditu “, dio Gorka Artola konpainiako CEOak.
Bizitzako lehen urtean, lehen bi produktu-familiak definitzen eta garatzen lan egin dute. “NK-AIgovernance sortu dugu, gure gobernu-plataforma IA enpresariala modu seguruan, fidagarrian eta AI Act betez hartzea bizkortzeko, eta NK-CODEx, software kritikoa automatikoki eta modu fidagarrian sortzeko, mantentzeko eta modernizatzeko IA sistema autonomoa”. Produktu honek % 90 murrizten du softwarea lengoaia modernoetara itzultzeko denbora.
Bost langilez osatutako lantaldea
BIND programan parte hartu du Oronak, enpresa bultzatzaile gisa, eta bere NK-CODEx sistemako pilotu bat garatu du.
Bost langilek osatzen dute orain lantaldea, “eta 20 pertsona baino gehiagok laguntzen digute teknologia- eta merkatu-garapenean gure enpresa bazkideetatik”. Beren produktuen lehen bertsioak kaleratu berri dituzte. “Dagoeneko lehen salmentak ditugu, eta 2027an milioi bat euroko fakturazioa gainditzea espero dugu”.
Innkiak aurrekontuaren % 75 inguru bideratzen du I+Gra, eta langileen erdiak lan horiek egiten ditu.
Etorkizuneko erronkek balio disruptiboko proposamen bat merkaturatzea eskatzen dute, “eta horrekin posible egiten ditugu orain arte bideraezinak izan diren gauzak, hala nola COBOLean idatzitako software kritikoko sistemak modernizatzea, edo testing unitarioa bizi-zikloan sartzea, hainbat hamarkada eraikitzen daramatzaten eta oinarrizko mekanismo hori ez duten sistemen software segurua garatzeko”.
Proposamen berritzaileak direnez, erreferentzia eta arrakastekin “aurre egin beharreko aldaketari diogun beldur naturala” indargabetu behar dute. Hori da gure erronka eta helburu nagusia datozen urteetarako”.