Nafarroako Gobernuko Turismo Zuzendaritza Nagusiak joan den ekainean formalizatu zuen Turismoaren Mundu Erakundearekiko atxikimendua, NBE Turismoaren 126. kontseilu betearazlearen bileran, Toledon, non Ana Rivas Turismoko zuzendari nagusiak parte hartu baitzuen.
Nafarroako Turismoak nazioarteko foro horretan parte hartzeak atea irekitzen die nazioarteko proiektuetan parte hartzeko, erakunde eta enpresentzako truke profesionalak egiteko, datu estrategikoak emateko eta Nafarroa erreferentziazko turismo jasangarriaren helmuga gisa kokatzen lagunduko duten hainbat kongresutako txostenak egiteko aukerei.
UN Tourism erreferentziazko erakundea da Nazio Batuetan. Bere funtzio nagusiak dira turismo jasangarria sustatzea hazkunde ekonomikoaren, garapen inklusiboaren eta ingurumen jasangarritasunaren motor gisa, eta, gainera, turismo politikaren foro global gisa eta sektoreari buruzko ezagutza iturri gisa balio izatea (estatistikak, praktika onak, lankidetza teknikoa). Madrilen du egoitza, eta 160 estatu kide, lurralde elkartu gehiago eta sektore pribatuko milaka kide afiliatu, hezkuntza-erakundeak eta turismo-erakundeak biltzen ditu.
NBE Turismoaren bilerak Espainia munduko eztabaida turistikoaren epizentro bihurtu zuen egun horietan, turismo jasangarriago, berritzaileago eta inklusiboago baten garapenean zentratutako erakunde horren indartzean eta rolean sakonduz. Gainera, jardunaldi horietan gure herriarentzat garrantzitsuak diren gaiak landu ziren, hala nola turismoaren egoera geopolitikoaren ondorioak, jarduera turistikoaren gobernantza, jasangarritasuna, digitalizazioa edo turismoko adimen artifizialaren erabilera.
Hurrengo hitzordua Mexikon
Gainera, datorren irailean, naturan garatutako kirol turismoari buruzko esperientzia eta proiektuak azaltzeko gonbidapena jaso du Nafarroak, World Sports Tourism Congressen laugarren edizioan. Mexikon irailaren 7tik 9ra egiten den foroa da, eta arduradun politikoak, helmugetako kudeatzaileak, kirol ekitaldi handien antolatzaileak eta turismoari eta kirolari lotutako nazioarteko enpresak biltzen ditu.