Cidetec eta CIC EnergiGUNE euskal ikerketa-zentroak LiPLANET elkartearen zortzi sortzaileetako bi dira. Elkarte horrek litiozko baterien I+G planten Europako sare pilotua sortzea sustatuko du.

Erakunde berri horren helburua Europa “baterien ekoizpenerako mundu mailako kokapen estrategiko eta lehiakor” bihurtzea izango da, ikerketa teknologikoko bi zentroek atzo jakinarazi zutenez.

LiPLANET Europako Batzordearen proiektu batetik sortutako ekimena da, litiozko bateria-gelaxkak ekoizteko eta berritzeko ekosistema europarra sortzea errazteko.

Nuria Gisbert CIC EnergiGUNEko zuzendari nagusiak azaldu duenez, “Sinergiak sortzeko eta, batez ere, industria mailan proiektuak garatzeko benetako aukerak sortzeko aukera da ekimen honen funtsezko faktoreetako bat”.

Oscar Miguel Crespo Cidetec Energy Storage enpresako zuzendariak gaineratu duenez, “LiPLANETen bidez, litiozko baterien alorrean Europa protagonista izan dadin lagundu dezakegu, baita horiek ekoizteko kokaleku estrategiko izan dadin ere”.

Bere estatutuetan agertzen den bezala, LiPLANETen helburu orokorra da berrikuntza- eta ekoizpen-ekosistema europar bat sortzea, litiozko bateria-gelaxken fabrikazioaren esparruan industria-sare lehiakorrago bat eraikitzeko.

Era berean, litiozko gelaxken ekoizpena handitu nahi du industria mailan, baterien sektoreko Europako ildo pilotu garrantzitsuenak eta eragile nagusiak bilduz.

Euskal zentro teknologikoekin batera LiPLANET sortu duten erakundeak Belgika, Austria, Frantzia eta Alemaniako hiru zentrotakoak dira.

Egilea Andoni Beitia