Bat Etorri/Consenso Gipuzkoako pentsiodunen plataformak “estatu mailako mobilizazio egutegi bat modu bateratuan koordinatzea” proposatu du, “Elkarretaratze handi bat” egiteko Madrilen udazkenean, “Oinarrizko aldarrikapenak” aintzat hartzen ez badira.
Bat Etorri taldeak atzo azpimarratu zuenez, joan den larunbatean “milaka pentsiodun atera ziren kalera, bai Euskadin, bai Estatu osoan, pentsio publiko, duin, justu eta nahikoak defendatzeko”.
Ildo horretan, gogorarazi zuen helburua zela “pentsioen arloko gobernu-akordioa bete dadila eskatzea, besteak beste, Gizarte Segurantzari diru-sarrera nahikoak ematea, pentsioen erosteko ahalmena KPIaren arabera legez ziurtatzea eta IRP ( % 0,25) indargabetzea, jasangarritasun-faktorea indargabetzea, gutxieneko pentsioak hobetzea eta pentsioetan genero-arrakalari ekitea”.
Euskadiri dagokionez, Gipuzkoako pentsiodunek eskatzen jarraituko dute “gutxieneko pentsioak gutxieneko soldatarekin parekatzen ez diren bitartean, Eusko Jaurlaritzak osatu ditzala, DSBE bidez, unean-unean indarrean dagoen LGS baino zenbateko txikiagoa duten pentsioak”.
Pentsiodunen mugimendua “askotarikoa eta plurala” dela azpimarratu du Bat Etorri ekimenak, eta, beraz, garrantzitsua dela “2019ko urriaren 16an Madrilen egin genuen manifestazioan eta ondoren egin genuen elkarretaratzean erakutsi genuen batasun espiritua gogoratzea”.